E bon maneho financiero di Aruba ta arma principal na 2024
*Democracia Constitucional y Statuut ta topa na momento historico
*”Vox Populi, Vox Dei” a bira herment pa Hulanda den Reino Hulandes
ORANJESTAD (AAN) — Dia 2 di Juli 2024 a recorda cu dia 2 di Juli 1951, Aruba a conoce su prome Conseho Insular den e cadena di cambionan constitucional, cu a culmina den e logro historico di Status Aparte di Aruba, cu como pais autonomo ta parti di Reino Hulandes.
Dia 2 di Juli 2024, Reino Hulandes a conoce otro momento historico na momento cu un Gobierno Hulandes cu tambe ta base pa e Gobierno di Reino, oficialmente a conoce su inicio.
E palabra mas importante cu ta bini dilanti dia 2 di Juli 1951 y dia 2 di Juli 2014, ta cu e palabra “cambio”ta resona den un Reino agota pa situacionnan cu ta afecta e nucleo di democracia, cu ta bienestar di e Pueblo.
Ta pa motibo cu democracia mester ta herment di Pueblo, e Voz di Pueblo na urna electoral ta cambia curso di historia y maneho di un pais, pero cu un exigencia cu nunca ta cambia.
Den tur lucha di Pueblo ta mira e figura di e persona cu ta lansa su mes como portavoz y dirigente, di e deseonan mas intimo di un Pueblo cu e ta traduci den e kucha cu mester conduci na un maneho nobo na interes di loke e Pueblo ta anhela.
Dia 2 di Juli 2024, Hulanda a conoce un Gobierno nobo a base di e decision di e mayoria den Parlamento Hulandes.
E figura politico cu tabata central den e formacion di un Gobierno Hulandes nobo a base di decision di Pueblo na urna electoral, no ta dirigi Gobierno pero ta dirigi e Voz di mayoria di Pueblo den Parlamento Hulandes, Tweede Kamer, mescos cu ayera for di Parlamento di Aruba, e lucha pa cambio di e realidad politico di e tempo di Aruba, a wordo dirigi dor di e politico cu a representa e mayoria den Parlamento.
Kico 2 di Juli 2024 ta bisa Aruba? Cuanto elemento ta topa na un forma historico?
Na prome lugar, dia 2 di Juli 2024 Hulanda a habri oficialmente e “Era di Geert Wilders”, cu sea cu henter mundo kier acepta of no, ta e decision di Pueblo Hulandes pa cambio na fabor di loke e Pueblo di Hulanda ta considera su bienestar.
Na e momento cu e Gobierno Hulandes nobo oficialmente a wordo instala, e lider cu e popularidad mas grandi na e momentonan aki na Hulanda, Geert Wilders, a expresa palabranan cu mester wordo tuma na consideracion.
Wilders a declara cu si sigui acusa e Hulandesnan preocupa pa nan pais di ta racista, su partido lo termina cu 57 asiento, pues mayoria total den Parlamento Hulandes.
Loke ta bini dilanti den expresion di Wilders, tabata, cu si oponentenan politico sigui bay contra e politica di Wilders cu ta basa riba cambio na Hulanda y asina den Reino y den cual ta pone e deseonan di Pueblo Hulandes central, Wilders y su partido lo sigui crece pa asina a base di decision na urna electoral, Pueblo Hulandes duna prueba cu ta e maneho di Wilders y su partido e kier pa Hulanda.
Aki Aruba mester reflexiona y puntra su mes, si Aruba ta suficiente fuerte pa confronta loke Wilders ta presenta na Pueblo Hulandes, cu realmente ta e principio di e sistema democratico cu mester percura pa cumplimento di deseo di e votadornan.
Status Aparte a duna Aruba e oportunidad pa hiba e maneho cu a haci Aruba subi un caminda, cu e no ta keda dependiente di placa Hulandes, pa e por para financieramente riba su pia.
Gabinete Evelyn Wever Croes a duna contenido financiero na loke Betico Croes a logra pa Aruba riba tereno estatal.
Aruba por cubri su gastonan cu su entradanan, pagando e debe nacional cu Gabinete Evelyn Wever-Croes a hereda di Gobierno Mike Eman y asina entrega na Reino e prueba, cu e no kier depende di placa di otro pero por percura pa su mes.
Di e forma aki 2 di Juli 2024 ta bira sumamente importante pa Aruba den Reino, pasobra Gobierno Evelyn Wever-Croes por encabeza Aruba na un forma triunfante na entrada di e Era di Geert Wilders, cu sin duda lo bini cu un pakete di exigencia pa islanan Hulandes den Caribe, no bira un peso financiero pa e votador Hulandes.
2 di Juli 2024, fecha di cambio grandi den Reino, caminda e carta mas importante di Wilders lo ta, autonomia financiero di e paisnan Hulandes den Caribe pa asina realmente nan ta partner den Reino.
A base di e resultadonan di Gobierno Evelyn Wever-Croes, Aruba cu curazon trankil, ta drenta e Era di Geert Wilders, decisivo pa gobernacion di Reino a base di e realidad di monarquia Constitucional, cu ta haci Aruba parti di un Reino pero na mes momento responsabel pa su propio bienestar financiero!
