Rubiella Toppenberg di FADA:
ORANJESTAD (AAN): Nos ta den temporada yen di fiesta, comemento y diferente actividad relaciona cu Pasco y fin di aña. Den e periodo aki, uzo di alcohol tambe ta presente of ta aumenta. Fundacion Anti Droga Aruba (Fada) e fin di aña aki un biaha mas a lansa su campaña di “BAR”, ‘Bo Amigo Responsabel’. Señora Rubiella Toppenberg, den un entrevista cu DIARIO, a enfatisa e importancia pa haci uzo responsabel di BAR, un amigo responsabel, y pa regla esaki di tempran y no na momento cu ya ta uzando alcohol, of ora ya ta laat.
Segun señora Toppenberg, BAR durante e aña aki a duna bon resultado y Fada ta satisfecho cu e trabounan cu nan a logra, apesar di ta desea di por a haci mas. El a expresa cu nan meta pa 2026 ta pa acerca mas compania pa logra un bon fondo pa sigui pa haci mas pa e campaña di conscientisacion aki.
Señora Toppenberg a expresa cu BAR ta un demanda grandi den nos comunidad. Keto bay accidentnan, cu por ta relaciona cu uzo di alcohol, ta tuma luga.
“Den e dianan aki di fiesta, haci uzo di bo BAR, bo amigo confiabel y responsabel cu por hiba bo cas sigur, y no maneha bo mes y evita accident y mas ainda, evita dolornan durante e temporada di fin di aña”, señora Toppenberg a enfatisa.
