Departamento di Salud Publico:
ORANJESTAD (AAN): Den e dianan cu a pasa Aruba a experencia basta yobida. Algun persona ta mira esaki como un bendicion, pero e por ta tambe inicio di un menasa pa salud publico si como poblacion nos no ta conciente y traha hunto pa minimalisa e risico di malesanan transmiti pa sangura.
Manera ta conoci, sangura mester di awa pa por buta su webonan. Mas awa keda para rond di cas despues di yobida, mas oportunidad e sangura tin pa broei dentro di 5-8 dia.
Pa hunto nos por minimalisa e risico cu Aruba por experencia aumento di casonan di Dengue, ta importante pa como comunidad, nos tur hunto ataca e problematica for di su raiz. Esaki ta ensera reduci of stop e sangura di sigui broei na cantidad grandi.
Esaki nos por haci door di:
- Tira afo of warda tur obheto cu por retene awa innesesariamente paden y rond di cas, scol y trabou. Por ehempel scoter bou mata, tire, coy hunga pafo, vas cu mata of flor etc.
- Tapa tur awa para cu tin proposito manera e.o pa muha mata of duna bestia. Por ehempel hemchi bou erco of bari cu awa di yobida etc.
- Ta extra alerta riba awa para cu proposito di bida pa mata of mascota por ehempel vas cu mata of flor, baki awa di bestia, vijver cu mata di lili etc.
Departamento di Saludo Publico su seccion di GKMB ta yuda den e proceso aki door di controla areanan publico, bishita casnan unda tin caso positivo di malesa transmiti pa sangura y duna informacion na casnan den bario durante dia. Pero seccion di GKMB no por bishita tur cas rond Aruba pareu, pa cual motibo eta keda responsabilidad di cada propietario di cas pa controla y mantene su espacio liber di awa para.
Pa algun aña caba seccion di GKMB ta implementando un maneho pa cu cuido y proteccion di nos flora y fauna y no ta core rond spuit barionan mas cu veneno, cu exepcion si tin casonan positivo di malesa transmiti pa sangura den e area.
