Parlamentario Rocco Tjon hopi preocupa:
*El a haya reaccion di departamentonan publico
ORANJESTAD (AAN)—Den e conferencia di prensa di Fraccion di MEP, e siman aki, Parlamentario Rocco Tjon a elabora riba e amienda cu a wordo entrega Diabierna ultimo, na inicio di tratamento di e presupuesto, specificamente riba e punto di reduccion di 10% riba “goederen en diensten” (producto y servicio).
“Esaki tin mi persona hopi preocupa y mi ta bay splica tambe di con. Mi ta bay presenta e reaccion tambe di tur e diferente departamentonan. Nan a comunica caba na mi persona, kico e impacto di esaki ta bay ta, pasobra Diabierna, na momento cu e reunion a wordo suspendi, mi a manda un carta na tur e departamentonan cu ta resorta bao di mi persona, anto mi a puntra nan pa splica mi, exactamente, kico e impacto di reduccion di 10% ta bay nifica”, e parlamentario a señala.
Pa cuminza el referi na locual el a scucha di señor Mike Eman na momento cu el a sali for di Fort Zoutman, ora cu el a expresa cu den e ronda cu el a tene cu tur departamento y tur stakeholder, e sa cu tin mester di personal, cu e departamentonan aki mester di ayudo financiero, cu tur organizacion tin falta di recurso, anto e no por compronde un decision asina.
“Un decision sigur descabeya. Anto mi tin reaccion di Ministerio Publico, Bureau Sostenemi, Departamento di Labor, Directie Arbeid en Onderzoek, Departamento di Asunto Social (DAS), Departamento di Mucha y Hoben, Bureau Traimerdia, Voogdijraad, y Landsrecherche”, Parlamentario Tjon a indica y bisa cu e lo elabora specificamente riba cuater di nan, aunke tur departamento a trece e mesun reaccion padilanti.
Den otro articulo Parlamentario Tjon ta referi na e consecuencia riba e servicionan cu DAS ta brinda comunidad.
