ORANJESTAD (AAN) - Desde dialuna 1 di November 2021 Departamento di Labor y Investigacion (DAO), Oficina Central di Estadistica (CBS) y Centrale Bank di Aruba (CBA) a cuminsa cu e di diesun (11) Encuesta di Forsa Laboral (EFL 2021).
E EFL 2021 ta tuma lugar den forma digital y via telefoon y ta ehecut’e na un forma similar na Censo 2020. Pa e EFL 2021 a escohe un muestra di adresnan reparti riba henter Aruba cu a participa na Censo 2020 y cu a indica cu nan lo kier sigui traha hunto cu CBS pa futuro investigacionnan.
Participantenan a ricibi dialuna ultimo (1 november) un e-mail cu un link pa yena e cuestionario online, for di CBS unda tambe ta duna mas splicacion riba e investigacion. Ta pidi encarecidamente na tur esnan cu a yena nan e-mail durante Census 2020, pa controla nan e-mail, tambe den junk mail, pa verifica si nan a ricibi un e-mail di CBS. A manda e e-mail for di This email address is being protected from spambots. You need JavaScript enabled to view it..
E cuestionario ta facil pa yena. Click riba e link den e e-mail y esaki ta habri y por cuminsa contesta e preguntanan. No lubida na final pa click riba e sign di FINISH pa asina digitalmente entrega e formulario. Na tur esnan cu tin pregunta, of tin duda den kico pa contesta na algun pregunta, of esnan cu ta desea di haya un yudansa pa yena e cuestionario, por yama: 524 7400 (lo yama bo persona bek!) of manda un e-mail na: This email address is being protected from spambots. You need JavaScript enabled to view it..
Ta bay yama e personanan cu durante di Censo 2020 a indica cu nan kier coopera cu investigacionnan cu CBS pero no tabata tin un e-mail pa yena e encuesta via telefon. Tur persona den e hogar mester yena e encuesta. Esnan di 15 aña bay ariba lo haya preguntanan relata na educacion, labor y entrada segun principionan di e Organisacion Internacional di Labor (ILO) ya cu ta considera nan como parti di e forsa laboral di un pais.
E team di LFS2021 ta telefonicamente disponibel pa contesta cualkier pregunta cu tin, y tambe nan por asisti den e yenamento di e cuestionario.
E EFL 2021 tin como meta pa forma un imagen actual y completo di e mercado laboral di Aruba. Pa medio di e informacion compila tambe lo determina otro caracteristicanan y indicadornan importante di e mercado laboral cu ta necesario pa un analisis mas profundo di e mercado laboral, manera e.o. e grado di participacion y e nivel di educacion di esnan emplea, esnan no emplea y esnan cu no ta activo riba e mercado laboral.
Privacidad
Tur informacion procesa ta keda anonimo y lo public’e solamente den forma agrega. E privacidad di cada persona y hogar ta garantisa pa DAO, CBS y CBA. Ta gradici bo persona di antemano pa bo participacion na e EFL 2021.
