Desaroyonan mundial actual ta sostene mas vigilancia frontera na 2024
*Exigencia Venezolano pa derecho Guyanes y su rikeza petrolero
*Maduro a papia di Aruba como teritorio maritimo di Venezuela
ORANJESTAD (AAN) — E siman aki, sin duda, bista di mundo tabata fiha riba Medio Oriente, cu na e momentonan aki hunto cu Ukraine, ta decisivo pa desaroyonan mundial na caminda pa 2024.
Reclamo teritorial ta base di e problemanan cu Medio Oriente a y ta conoce, loke ta un topico den desaroyonan mundial actual sigur mester haya atencion.
Historia por produci guera a base di cual teritorio ta pertenece na cual pais? Esaki ta e pregunta importante cu mester bati alarma na Aruba, cu ta situa den porta di Venezuela, pais cu ta forma e unico frontera di Aruba cu otro nacion.
Na 1978 Reino Hulandes a firma un tratadi cu Venezuela pa asina oficialmente a regla asuntonan di frontera entre Venezuela y e Islanan Hulandes den Caribe.
Di e forma aki oficialmente e soberia di Aruba a keda establece.
Pero, Nicolas Maduro ta respeta e acuerdo aki?
Den e acuerdo cu Citgo cu a wordo firma entre Gobierno Mike Eman y Nicolas Maduro, DIARIO a mustra riba uno di e asuntonan mas peligroso cu tabata e entrega di base economico di Aruba pa medio di Citgo, na Nicolas Maduro cu publicamente a mantene semper cu Aruba ta den awanan teritorial di Venezuela y cu Aruba por wordo considera teritorio di Venezuela.
Con importante e acuerdo cu a wordo alcansa pa dicidi riba e frontera maritimo entre Aruba y Venezuela ta?
Rumbo pa 2024, mundo ta dependiente di un disputa di legalidad di tereno y derechonan di paisnan, a produci.
Reclamo historico di tereno ta bini dilanti den e crisis mundial actual tanto na Ukraine como na Medio Oriente, pero tambe directamente den e posicion di Nicolas Maduro enfrente Guyana, cu parcialmente Nicolas Maduro ta considera teritorio Venezolano.
Venezuela ta exigi e derechonan riba e region Essequibo na Guyana, cu tin reservanan grandi di petroleo den su suelo. Pues e situacion den porta di Aruba, ta hiba mundo atrobe na poder di petroleo na Ukraine, cu e depositonan enorme di petroleo den su suelo y na Medio Oriente centro di petroleo y combustibel pa un gran parti di mundo.
E conflicto di Nicolas Maduro cu Guyana, e zona total di Guyanan cu originalmente a inclui Surinam como Guyana Hulandes como resultado di e tempo di conquista, ta mas cu bibo.
Nicolas Maduro a mara region di Caribe na petroleo di Venezuela, manera el a trece dilanti tempo cu Gobierno Mike Eman a entrega e restonan mortal di Lago na su Gobierno.
Na momento cu Merca a base di otro promesa di Nicolas Maduro, awor a deshaci di parti di su medidanan contra Maduro, un crecemento economico di Nicolas Maduro ta wordo spera den porta di eleccion Venezolano, pero tambe den un crisis mundial den cual Nicolas Maduro a posiciona su mes directamente tras di Rusia, cu hasta a deshaci di su derechonan riba Citgo, cu a bira otro confrontacion entre Maduro y Merca.
E spiertamento pues di DIARIO tempo kier a entrega Nicolas Maduro e terenonan di Lago, mester wordo mira den un luz nobo sigur den e situacion mundial actual den cual e fin di poder economico di petroleo, ta causa lama sumamente bruto.
E posicion di Nicolas Maduro enfrente Guyana, cu lo habri su poz di rikeza pa medio di petroleo y crea un economia propio fuerte, ta bati alarma pa un peligro den region di Aruba, na caminda pa 2024.
Hopi presion ta wordo pone riba Gobierno di Aruba pa loke ta trata fronterandn di Aruba, cu Nicolas Maduro a cera na 2018 cu e acusacion serio cu Aruba hunto cu e otro islanan Hulandes, tabata kibra economia Venezolano cu ladronicia di productonan Venezolano, cu e Pueblo di Venezuela mes tabata tin mester den e desaster cu Nicolas Maduro a crea.
Corte Internacional di Husticia, situa na Den Haag a deshaci di e exigencia di Nicolas Maduro pa parti di Guyana wordo considera teritorio di Venezuela.
Un guera pa teritorio ta presenta su mes den porta di Aruba, cu a logra deshaci di e peligro cu Nicolas Maduro por a podera di su economia cu e proyecto Citgo.
Aruba, sinembargo, den e situacion mundial na 2024 mester sigui vigila loke ta pasa den su porta di cas, mas ainda enfrente eleccionnan na cual mas cu 7 Miyon Venezolano no por tuma parti, pasobra nan mester a huy di nan pais dirigi pa Nicolas Maduro. Mas ainda sin lubida e expresion di Nicolas Maduro, cu Aruba ta den awanan teritorial di Venezuela!
