Frans Ponson, presidente di CUA:
ORANJESTAD (AAN) – Frans Ponson, presidente di CUA (Comerciantenan Uni Aruba) den entrevista cu DIARIO tocante e rebaho di 10 cent cu gobierno a implementa riba prijs di liter di gasoline, a splica kico esaki ta nifica pa comercio.
Ponson a bisa cu Aruba su economia ta den constante movecion, y el a splica cu e prijs di gasoline pa companianan cu ta uza hopi transporte por nifica algo, pero no pa un cu ta bende un producto so, cu ta djis move di port pa negoshi, cu ta e caso pa mayoria di comerciante.
Ponson a agrega cu pa un compania di transporte e ora ey e ta hopi significante pa su negoshi, si ta un compania cu ta transporta miles di miles. E ora ey e ta mas cu un compania cu ta bende un producto pasobra esaki unico cu tin ta e movecion di e producto for di port pa e negoshi y esey no ta haci e rebaho di diez cen ey relevante.
“Si, e prijsnan cu ta cambia internacionalmente, ta mas significante cu e bedrag ey. Claro, si coriente ta baha ta otro, pero esey nos no a wak ainda cu a pasa”, el a indica.
Segun Ponson, pa mayoria di comerciante e rebaho ey ta hopi abao si nan no ta den e mundo di transporte di ekipo pisa, unda ta papia di hopi placa. “Di nos miembronan, mayoria ta retailnan anto e margen ta hopi poco pa haci un cambio pa e prijs pa pueblo”, el a señala.
Ponson a reitera (hopi biaha el a menciona esaki) cu loke ta significante pa e comerciantenan ta e invoerrechten, e container cu ta costa diez mil florin, anto si ta coi e transport di port pa e negoshi, si envez di ta dos florin el a bira cinco florin, pasobra e truck a core di port p’e negoshi pa 4.70 florin, e 30 cen ey un comerciante no ta bay hinc’e aden. “Si gasoline baha mitad di prijs, awo ta otro. Pero atrobe, si ta un ekipo pisa of e hendenan den e mundo di transporte cu ta gasta miles di miles si e baha, nan ta suppose di hinc’e den nan prijs e ora ey. Esun cu ta transporta e producto pa nos, pa cualkier comerciante tin un fix prijs. Kiermen e no ta cambia e prijs cu e ta cobra mi pa trec’e, si gasoline subi of baha pero e tin cu wak con den su negoshi e por baha e gasto ey. Ami tin un prijs standard di un truck pa bin pa mi negoshi”, Ponson a menciona.
El a agrega cu mayoria comerciante tin un 'delivery fee', cual no ta cambia pa e prijs di gasoline. E comerciante cu ta 'delivery' e producto mester wak con e ta negocia ora cu prijs ta subi y baha.
