Directie Natuur en Mileu:
ORANJESTAD (AAN): Directie Natuur en Mileu a trece un informacion interesante tocante e rato di anochi lomba sunu.
E raton di anochi lomba sunu, na Ingles tambe ta referi na dje como e “Lesser Naked-backed bat”, su nomber cientifico ta 𝘗𝘵𝘦𝘳𝘰𝘯𝘰𝘵𝘶𝘴 𝘥𝘢𝘷𝘺𝘪. E sorto aki ta pertenece na e famia di Mormoopidae. E ta un di e seis generonan di 𝘗𝘵𝘦𝘳𝘰𝘯𝘰𝘵𝘶𝘴.
E raton di anochi lomba sunu ta entre e mormoopidaenan di mas chikito, y por yega un largura di 85 milimeter. Bo por distingie di e otro mormoopidaenan di e mesun grandura door cu e 𝘗. 𝘥𝘢𝘷𝘺𝘪 su membrananan di su hala ta origina for di meymey di su lomba (dorsal). Esaki ta haci cu ta parce cu su lomba ta sunu, mientras ta e membrana ta loke no tin lana riba dje.
Nan tin dos temporada cu nan lana ta cay y e color por varia di bruin y tambe e color oraño. E largura di e lana tambe ta varia poco mas largo bou di e halanan compara cu mas cortico na otro parti di su curpa. Grandura di e halanan di P. davyi ta mas o menos 50 milimeter.
E machonan ta mas grandi cu e hembranan den largura di e hala y diferente midinan di e craño (schedel). E rabo ta mas o menos 22 milimeter largo, y ta extende dos tercera parti di e largura di e uropatagio (e membrana memey di e dos pianan patras).
Durante cu e raton di anochi lomba sunu ta sosega e ta manda su uropatagio dilanti, cu ta dun'e un apariencia cu e no tin rabo. Su cara ta mustra poco desforma, su nanishi ta incorpora cu e lip ariba y poco hancho cu un craño cu ta peilo dilanti y su horeanan ta mas o menos 19 mm largo.
E raton di anochi lomba sunu ta regula e temperatura di su curpa uzando su halanan. E sorto aki ta come insectonan, manera sangura y tambe barbuletnan. E sorto aki por gara 25 lebelebe pa minuut p’e come. Nan ta bebe cu ayudo di nan halanan.
Raton di anochi lomba sunu ta biba den cueba of minanan unda ta calor y humedo. Un cos si ta cu e raton di anochi lomba sunu ta mas dominante cu e otronan cu nos tin na Aruba. E sorto aki por tin rabies, nan ta un raton di anochi agresivo y por morde y esaki por ta peliger pa salud di hende. Por ehempel na Mexico e sorto aki ta mescla cu e sorto di raton di anochi vampiro. Esaki por ta e causa di morto di hopi raton di anochi lomba sunu. Na unda nan ta haya mordi y ta muri.
