Marco Berlis (MEP):
ORANJESTAD (AAN): Recientemente nos por a observa con 20 di December 2024 Miguel Mansur den su ansha di “morto” politico a entrega un ley cu kier legalisa tur tipo di soft drugs na Parlamento di Aruba. Sinembargo, investigacionnan international ta mustra claramente cu “soft” drugs ta adictivo, ta peligroso pa nos salud, y ta causa adiccion psicologico entre otro. Mas sorprendente ta, pa compronde con Mansur, un ex-dicto cu a experiencia e lucha fuerte y tristeza cu ta rondona adiccion di droga, awor kier sigura comunidad cu un ley asina ta beneficioso pa e ciudadanonan di nos pais!
Ademas, e ta sigura den su propaganda cu “soft drugs” no ta adictivo y tin riesgonan “abao!” (Wak su post di facebook 20 di Dec.) Esaki ta un declaracion totalmente falso y peligroso cu no ta nada nobo ni straño, specialmente ora ta trata e persona di Miguel Mansur.
Kico investigacionnan internacional ta bisa di “soft drugs”?
E consecuencianan di uso di e droganan aki ta sinti tur rond di nos isla. Famianan ta den crisis, problema matrimonial, muchanan ta “drop out” di scol. Un investigacion internacional di Dr. N.Volkow (MD), Ruben Baler (Ph.d), Dr.Wilson Compton (MD) y Susan Weiss (Ph.d) na 2014 ta duna nos un bon bista riba e efectonan di e droganan aki;
- **Efektonan di uso na korto plaso**
- Memoria di corto plaso afecta, hasiendo dificil pa siña i retené informacion.
- Coordinacion motorico afecta, interferiendo cu habilidad di core auto cu ta aumenta e riesgo di accidente y lesion.
- Huicio altera, aumentando e riesgo di comportacion sexual cu ta facilita transmision di malesa sexualmente transmiti.
- Na dosis halto, paranoia i psicosis
**Efectonan di uso na largo plaso of uso pisa**
- Adiccion (den mas o menos 9% di usuarionan en general, 17% di esnan cu cuminsa uza durante adolescencia, y 25 te 50% di esnan cu ta usuarionan diario)
- Desaroyo di cerebro altera.
- Resultado educacional pober, cu un aumento den probabilidad di bandona scol.
- Deterioro cognitivo, cu un IQ mas abou entre esnan cu tabata usuarionan frecuente durante adolescencia.
- Satisfaccion di bida y logro disminui (determina basa riba medidanan subhetivo y obhetivo compara cu e evaluacionnan den e poblacion general)
- Sintomanan di bronkitis cronico
- Riesgo aumenta di trastornonan psicotico cronico (incluyendo schizophrenia) den personanan cu un predisposicion pa e tipo di transtornonan aki.
Ademas, “soft drugs” tambe ta wordo considera “gateway drugs,” (Fuente; Dr.Mills and Noyes, 1984, Newcomb and Bentler, 1986, Yamaguchi and Kandel, 1984), nan ta droganan cu ta facilita y encurasha consumo di droganan mas fuerte manera cocaine, LSD y otronan. E rapport tambe ta menciona con e droganan aki ta afecta bo salud; nan por provoca Cancer di pulmon, stroke y
atakenan di curason.
Den conclusion mi kier bisa esaki; “Legalisa droganan cu tin consecuencianan devastador pa hogarnan, nos bienestar general, salud y salud mental di nos
ciudadanonan, ta e forma cu Mansur kier pa nos pais “Biba Miho” manera su slogan politico ta bisa? “Biba Miho” kiermeen legalisa droganan cu a destrui bo bida pa asina hopi tempo? Mi no por conclui nada otro cu Miguel Mansur como politico ta keda un menasa y un peliger pa nos pais. No ta pornada pueblo a harta y a sac’e di Parlamento di Aruba!
