Miluska Sneek, Presidente di Fundacion Kidneys 297:
ORANJESTAD (AAN) Miluska Sneek, presidente di Fundacion Kidneys 297, a duna di conoce den entrevista cu DIARIO, cu e rapport di salud, ta ilustra un bon bista tocante locual e fundacion ta para p’e: cu falta concientizacion bao e populacion.
“Anto e generacion nobo cu por haci hopi uso di e tecnologia y e parti unda bo ta haya informacion tocante locual mester sa encuanto salud, of cualkier actividad fisico cu bo por haci y con por haci’e, e no ta suficiente.
“Pero e ta keda boluntad propio, cual e rapport tambe ta indica esaki; bo por tin hopi campaña, hopi informacion, bo por haci hopi cos pero e ta keda na e persona mes pa sa cu esaki ta importante p’e, cu su salud mester ta prioridad pa e persona mes”, señora Sneek a señala.
Sneek a comenta cu e fundacion ta purba cada bez cu nan tin un actividad of si nan ta traha conhuntamente cu otro partner, keda indica esaki, no solamente ora cu nan tin un lectura, y tur informacion ta riba Facebook.
“Nos ta keda pidi e comunidad di Aruba tambe subi likes na e paginanan di diferente fundacion, participa den cualkier actividad cu nan tin, pasobra esaki ta yuda concientiza otro”, señora Sneek a señala.
El a reitera cu ta keda na e persona mes, pasobra malesanan cronico ta tarda hopi pa manifesta complicacionnan, e ta un “silent killer” y esey ta keda pone hende kere cu nan tin tempo.
“Anto ora bo haya sintomanan bo por ta den un stage alarmante, y esey ta haci cu e persona ta keda warda, ta haci un cambio un rato, e ta mira di e cambio resultadonan positivo anto e ta bolbe cay den e habitonan di antes”, Miluska Sneek a enfatiza.
El a agrega cu malesa di riñon ta bin ora hende ta sufri di sucu, presion halto, obesidad. Esaki ta e malesanan cronico cu por daña bo riñon.
