Eagle ta habri porta pa Quanten y pa experto grandi den asunto di sushi --- *Encuesta Parlamentario mester investiga sushi y mas sushi scondi --- *Kende lo bira Director y kende lo bira doño den caso di bancarota?
ORANJESTAD(AAN)—“Un cortina di huma”. Palabranan cu ta wordo uza dor di informantenan clave pa describi e situacion actual na Aruba.
Manera a wordo indica na DIARIO, uno di e Ministronan cu mester tuma e decisionnan importante riba termino cortico, ta Ursell Arends.
Informacionnan cu DIARIO a ricibi ta indica cu un crisis a wordo causa na Aruba sin ningun motibo directo.
Un acuerdo a wordo firma entre Gobierno di Aruba y e compania Eagle LNG, cu ta un compania renombra, cu lo entrega gas na WEB, caminda inversionnan a wordo haci dor di Pueblo di Aruba.
Na November DIARIO a publica e informacion cu entrada di Eagle lo trece Quanten y cu entrada di Quanten ta nifica cu un compania experto riba tereno di atende cu sushi, ta haci su entrada.
DIARIO a mustra cu experto Mericano, cu a gana premio Nobel, ta sostene Quanten den su trabounan pa scapa companianan manera Serlimar.
Dispone di sushi awe ta un industria riba su mes, manera DIARIO a relata na November.
Manera a wordo mustra pa un compania Mericano por haci negoshi cu exterior, e mester sigui reglanan exigente di Gobierno Mericano.
Segun informantenan atencion ta wordo kita for di otro realidadnan na e momento aki y Pueblo ta wordo hinca den un situacion sumamente tenso pa loke ta trata e contracto cu a wordo alcansa cu Eagle LNG dor di Gobierno Evelyn Wever-Croes.
Mientrastanto e compania di Gobierno cu mester di atencion y ta den problema sumamente serio ta Serlimar cu mester haya un dirigente nobo pero tambe mester pone placa riba mesa pa paga tur debe cu a keda atras.
“Serlimar ta e compania cu ta atende cu sushi. Ora atende cu Serlimar ta papia di sushi y mas sushi pero tambe hopi intencion cu tin y tabata tin cu sushi,” informantenan ta bisa.
Aunke Gobierno Mike Eman a papia di “Go Green” no a pone placa riba mesa pa Serlimar cu a keda den problema serio.
Ursell Arends no ta desconoci cu e problemanan na Serlimar, caminda Anko Koopmans a bira director y caminda aparentemente Koopmans kier bolbe.
Koopmans ta miembro di e partido di Ursell Arends, cu den un futuro cercano mester dicidi kende ta bira director pero tambe kico ta haci cu Serlimar pa evita cu e ta wordo declara bancarota na inicio di 2022.
“Pakico Serlimar por bay wordo declara bancarota y kico lo pasa si e wordo declara bancarota?” informantenan clave a trece dilanti.
Na parecer di e expertonan cu ta atende cu DIARIO, mester bini un investigacion pisa di mucho mas cu actualmente ta haya atencion.
“Pa Ley ta castigabel pa un compania wordo dirigi den direccion di bancarota,” informantenan a indica.
Den caso di bancarota hopi hende ta wordo perhudica pero mester bende e compania pa haya placa. Kico esaki ta encera?
Informantenan ta indica cu na e momentonan aki no ta WEB, cu ta firma un contract cu a habri 2021 den atencion di Pueblo. Na e momentonan aki ta Serlimar cu semper a keda bou sombra di matanan politico, mester haya tur informacion.
Con leu Ursell Arends ta cu Serlimar? Kende e lo nombra proximamente como Director pa e compania cu hopi chens di bira difunto?
DIARIO ta sigui tur desaroyo den un situacion cu hamas Aruba por a pensa ta ataca Aruba na final di un 2021, cu un parti grandi di Pueblo a lucha pa sobrevivi.
