Expertonan tras di DIARIO ta haya razon den nan posicion
*Aumento salario minimo cu 10 porciento ta parti di critica
*Plan popular Gobierno Hulandes den tempo di crisis peligroso
ORANJESTAD (AAN) — Uno di e prome informacionnan cu a mira luz riba e plannan di maneho di Gobierno Rutte di Hulanda pa 2023, tabata e decision pa na 2023 sueldo minimo na Hulanda subi cu Diez Porciento.
Un peligro enorme y sigur algo cu Aruba no por imita, tabata e prome informacionnan cu DIARIO a ricibi di su expertonan cu a splica cu sigur den e tempo di crisis mundial, e decision di Gobierno Hulandes ta sumamente peligroso pa e pais.
Ayera e informacionnan di DIARIO cu un aumento cu Diez porciento di sueldo minimo y asina tur entrada cu ta mara na e haltura di sueldo minimo ta parti di un pakete cu no a cay den bon tera cerca e departamento di conseho di Raad van State despues cu Gobierno Rutte a entrega su plannan ayera.
Riba Prinsjesdag, ora Rey Willem Alexander na nomber di Gobierno di Reino presenta e plannan di Gobierno Hulandes pa e aña venidero, Gobierno Hulandes ta entrega su presupuesto pa 2023 na Parlamento Hulandes.
Den e plannan ta inclui e opinion di Raad van Advies cu ta e Consehero halto di Gobierno y Parlamento.
E plannan di Gobierno Rutte a inclui cu ta bay pone un prijs maximo pa tarifanan di gas y electricidad na Hulanda. E grupo mas vulnerabel lo ricibi un compensacion pa gastonan di energia mientras lo aumenta e compensacion pa cuido y pa huur entre otro.
Pa yuda tur hende na forma structural ta subi e sueldo minimo cu 10 porciento na 2023, loke ta nifica cu e sueldo lo subi di un solo bez cu un porcentahe halto, cu resultado pa tur pago social manera pensioen di behez y compensacionnan relaciona cu trabou.
Pa percura pa tur hende cu mas placa e pagonan cu nan mester haci a base di nan entrada na Gobierno ta wordo reduci na forma structural.
Gobierno Rutte ta sigui baha entrada di Gobierno cu reduccion di e tarifa number uno di Inkomstenbelasting mientras cu e reduccion di labor ta baha.
Manera DIARIO, a base di informacion di expertonan clave na Hulanda a trece dilanti, Gobierno Hulandes a pone un suma di 17.2 Miljard Euro disponibel.
Gobierno Rutte kier cubri e suma aki cu e balansa cu e ta bisa cu e ta crea entre belasting riba trabou y e belasting riba poder financiero.
Manera den nos prome noticia nos a trece dilanti riba e particularidad aki, e decision di Gobierno di Hulanda ta sumamente peligroso den un tempo di crisis y Aruba sigur no por sigui e ehempel aki aunke e por ta popular riba tereno politico.
Raad van Advies ta mustra riba e peligernan serio cu DIARIO den e proximo dianan lo trece dilanti y ta mustra tambe riba e impacto cu e decision di Gobierno Rutte tin riba e normanan di presupuesto di Union Europeo.
Tampoco nan ta cuadra cu e normanan Hulandes, aunke e situacion financiero di Hulanda te awor ta keda favorabel.
Mester tene e situacion mundial sumamente critico na bista, ta e opinion di e colegio halto Hulandes cu ta di opinion cu Gobierno Rutte a pura den realisacion di e presupuesto pa 2023 cu a wordo entrega ayera na Tweede Kamer oficialmente.
Un analisis mester a wordo traha, segun e colegio, di e situacion social economico di e pais cu riba termino mas largo ta enfrenta problemanan manera e aumento di edad promedio di poblacion, e crisisnan di clima y di energia.
Cu Gobierno Hulandes tambe tin problema pa atende cu su cifranan y problemanan na e pais, ta algo cu DIARIO a presenta for di momento cu Prome Ministro Rutte a splica cu e mester a sigui traha durante vacacion y ora hasta a convoca reunion di Parlamento pa papia di e forsa di compra na Hulanda.
Segun Raad van Advies no mester a aumenta e sueldo minimo pero mester a aumenta e cantidad di horanan di trabou na Hulanda, caminda tin un falta di trahador, loke tambe ta un peso pa e pais.
Pa loke ta trata energia, Gobierno Rutte a introduci un prijs maximo cu e compania por cobra pa awa y luz.
E documento di Raad van Advies segun expertonan cu ta sostene informacion di DIARIO na lectornan na Aruba, ta uno cu sigur mester haya atencion ya cu e ta duna prueba con hasta Hulanda, conoci pa un maneho fuerte riba tereno financiero y economico cu tambe ta exigencia pa participacion na Union Europeo, mester tene su mes na realidad segun Raad van Advies, cu ta considera cu Gobierno Rutte no a tuma e tempo necesario pa yega na e cifranan nacional pa 2023.
Mas detaye riba e rapport aki lo sigui.
