For di 2021 DIARIO a adverti pa desaroyonan den mundo di petroleo ---*DIARIO a spierta pa negoshi petrolero agresivo den region di Caribe --- *Negociacionnan pa refineria Petrotrin a culmina for di Mei 2022
ORANJESTAD(AAN)= Na 2021 mundo petrolero a subi un caminda cu DIARIO no a perde for di bista.
Na 2021 negoshi petrolero a haya un angulo special ora na Glasgow, Escocia, mundo a bini hunto pa papia riba cambionan di clima y e peligronan cu esaki ta encera pa humanidad y mundo.
Acuerdonan a wordo firma pa pone un fin na e negoshi di petroleo, cu for di e momento manera DIARIO a adverti, a drenta un fase cu continuamente mester a tene na bista.
Con lo deshaci di e negoshi di petroleo na mundo a bira e pregunta grandi na momento cu paisnan cu a bay di acuerdo na Glasgow a traha nan plannan, cu a wordo contesta no solamente dor di paisnan productor di petroleo cu a mira entrada disparce prome cu logra saca tur petroleo for di suelo na mundo.
For di momento cu mundo a yega e acuerdo pa defende clima, DIARIO a adverti cu lo mester tene na consideracion cu a mishi cu e negoshi mas grandi di mundo, cu ta e negoshi den petroleo y gas, cu mester yega na un fin na 2050.
Kico e acuerdo di Glasgow a nifica, a cuminsa bini dilanti sigur den region di Caribe, manera den cantidad di articulo DIARIO a trece dilanti.
Hasta DIARIO a mustra con paisnan manera Surinam, a dicidi di bira agresivo riba e tereno di exploracion y eventual explotacion di petroleo, cu a bira e negoshi di mayor interes sigur den region di Caribe.
Pa varios pais den e region di Caribe, e situacion a bira sumamente interesante pa e resultadonan financiero cu e lo a trece, pero tambe posibilidadnan pa duna bida nobo na refinerianan cu a cera nan porta.
Den diferente articulo DIARIO a mustra riba e situacion sumamente interesante cu a surgi, caminda di un banda mundo ta supuestamente traha riba un mundo sin energia sushi di petroleo, carbon y gas, pero di otro banda companianan tabata inverti sumanan enorme den e negoshi di petroleo, cu a haya un importancia mas grandi ora Rusia a dicidi di invadi Ukraine y prijs di petroleo a sigui subi.
DIARIO tabata pendiente di loke lo a pasa cu Quanten, e compania Mericano cu a haya sosten di Department of State di Merca, pa bira operacional den Caribe.
Mientras tur informacion tabata cu Quanten a keda interesa den Aruba, algun siman pasa DIARIO a ricibi un informacion cu Quanten ta den negociacionnan serio cu e gobierno di Trinidad y Tobago pa Quanten por cumpra e refineria Petrotrin, cu a cera su portanan tres aña pasa y ta propiedad di Gobierno di Trinidad and Tobago.
E informacion a bati un alarma serio pa DIARIO cu tabata tin e informacion cu Quanten tabata kier un refineria den e region aki pa asina e tin un refineria na Angola y otro na e otro banda di Oceano Atlantico.
E informacion oficial cu e proyecto Quanten Aruba lo no continua a drenta ayera na Aruba, cu segun informacionnan oficial di Gobierno, ya ta atende cu otro companianan cu por ta interesa den e terenonan industrial envolvi.
Segun informantenan por spera cu cualkier momento Quanten lo anuncia un acuerdo cu Trinidad y Tobago pa compra di e refineria Petrotrin.
