ORANJESTAD (AAN): E reto pa diversifica nos economia ta uno importante pa nos enfrenta.
"Comercio chikito y mediano ta forma un parti cardinal di e recuperacion economico", segun Minister di Asuntonan Economico, Comunicacion y Desaroyo Sostenibel, Mr. Geoffrey Wever.
Qredits Aruba ya caba ta conoci pa organisa e curso di "BeYourOwnBoss", cual mas di 200 persona a finaliza e curso existosamente den pasado y a ricibi nan certificacion. "Nos ta contento di por colabora cu Qredits Aruba pa hasi e curso di “BeYourOwnBoss” mas accesibel pa tur esnan cu ta interesa den drenta e mundo empresarial por medio di ofrece e curso na 2 diferente localidad.
Por medio di e colaboracion cu ministerio a logra no solamente di reduci e prijs pa participante - cual awo ta Afl 225 - pero tambe a añadi un localidad nobo cual ta EPB San Nicolas. "Nos kier sigura cu mas hopi hende posibel tin e oportunidad pa atende e curso aki, mirando su importancia pa stimula “local entrepreneurship", Minister Wever ta opina.
Qredits Aruba ta conoci den e mundo empresarial por medio di yuda varios comerciantenan cu financiamento pa lanta y expande nan propio negoshi. Qredits Aruba tambe ta sostene empresarionan via coaching, recursonan y programanan educacional. E curso di “BeYourOwnBoss” ta enfoca riba tur e aspectonan importante cu tin cu tene cuenta cune ora cu ta bay opera un propio negoshi.
Tur cursista lo haya acceso na e plataforma digital di “BeYourOwnBoss” y lo wordo guia door di un docente. E curso ta ofrece un "blueprint" pa por habri bo negoshi den un forma optimal y teniendo cuenta cu tur rekisitonan legal, proceso administrativo y tambe aspectonan di mercadeo cu ta necesario.
E curso ta cuminsa 7 di juni, y lo termina 28 di juli, cu lesnan riba diamars y diahuebs. Por scoge entre 2 localidad: Colegio EPI Oranjestad of EPB San Nicolas.
Ultimo fecha pa registra ta dia 31 di mei 2022. Por acudi na pagina di Facebook di Qredits Aruba caminda e formulario ta obtenibel pa registracion of pa mas informacion.
