ORANJESTAD(AAN)—Un mundo di horror ta wordo describi den documentonan y informacionnan cu ta cay den man di DIARIO,
cu mester haci su mes e pregunta si aki tabata trata di un luga pa pone ser humano y sigur mucha.
Increibel ta informacion cu ta cay den nos man di loke “Hoofd Commandant” manera muchanan ta yema Gilbert Webb ta haci cu mucha, cu mayornan ta entrega na un prizon cu ta un misterio grandi na un pais democratico.
Un lama di pregunta ta surgi cu cada informacion cu bini dilanti di Aruba Boot Camp di Gilbert Webb, cu segun informacion cu te awor DIARIO a compila, sigur no ta aplica pa por a dirigi un internaat di mucha y hoben basa riba su diplomanan.
E preguntanan di DIARIO sigur mester wordo pone den e informacionnan internacional cu DIARIO a cuminsa ricibi y cu ta mustra e temor grandi cu ta existi den exterior pa loke por pasa mucha y hobennan, cu pa motibo di nan comportacion na cas, por bira preso den campamentonan cu hopi bez ta wordo dirigi pa personanan dudoso.
Contactonan internacional di DIARIO ta hiba e matutino na e realidad di Boot Camp, cu mester wordo vigila den tur aspecto dor di autoridad debi na e forma cu dirigentenan di e camponan por abusa di mucha inocente.
“Ta trata aki di muchanan cu den cantidad di caso ta victima di e situacion den cual nan a nace y desaroya. Den cantidad di caso nan ta yiu di mayornan cu tin problema pa ta mayor, Mester di expertonan riba nan tereno pa atende e muchanan aki den situacionnan cu no por ta manera ta pasa den demasiado boot camp na mundo, caminda hende cu tendencia di abusado ta haya oportunidad di haci y deshaci cu mucha manera nan kier,” ta wordo trece dilanti.
DIARIO a bay tras di informacion di e Fundacion cu mester vigila kico Gilbert Webb y su ayudantenan ta haci cu mucha.
Por comprende cu e fundacion, segun registro di Camara di Comercio, ta wordo dirigi dor di tres persona. Gilbert Webb (cu ta yama su mes Webb-Lejuez) ta Presidente y Tesorero (esun cu ta dirigi placa).
Hubert Webb ta Secretario y Nathalie Maluska Lejuez ta Vice Presidente.
Esaki ta indica pues cu e fundacion ta den man di un trio di Webb-Lejuez pero obviamente ta ricibi placa di un forma of otro di hende cu lo kier aporta na “obra di caridad”.
E temor grandi di informantenan ta, e forma cu Gilbert Webb ta insisti cu e mester actua como “comandante” di su ehercito di muchanan cu e por castiga si nan no comporta manera (segun e fundacion) mester comporta.
E muchanan cu no comporta ta haya “straf”. Ta depende di Webb con e straf lo ta, segun e conceptonan di Webb di peso di loke ta merece straf.
E muchanan por wordo castiga na mas push up, na pusha tire, entre otro.
Esaki ta mas motibo pa alarma di parti di informantenan di DIARIO cu ta indica e peliger di push up cu en berdad ta un castigo den camponan cu tipo di hende cu ta yama nan mes comandante, ta introduci pa muchanan.
“Push Up” ta peligroso si no tin control di experto medico entre otro. Un mucha por wordo forsa loke ta pasa na e camponan aki pero tambe den camponan di concentracion cu ta uza e asunto di pusha tira tambe, como castigo.
Interesante ta bira cu segun informacion cu grupo Webb mes lo ta duna personanan cu kier sa mas di e campamento, cu aparentemente alumnonan di school, EPI, a yega di core stage, loke ta afirma cu den e sistema educacional di Aruba, a pesar di e spiertamento di instancianan oficial y e veredicto di Huez, tin e buraconan cu DIARIO a presenta ayera.
E investigacion ta continua mientras DIARIO ta trata na yega na mas informacion riba e personanan te awor desconoci cu ta forma parti di e supuesto docentenan di schoolnan di Webb, cu hasta por educa mucha na nivel di mas halto di educacion cu ta HBO.
E unico instituto di educacion cu ainda no tin riba lista di Webb ta universidad!
