Skirbi pa desaroyador, Alberto Perret-Gentil
ORANJESTAD (AAN): Despues di un biahe di Puerto Rico buscando oportunidad nobo pa haci negoshi, mi a tuma mi tempo y analisa e situacion na Puerto Rico. Despues di e horcan Maria, Puerto Rico a tuma un ruta diferente pa balansa su cuentanan fiscal, mescos cu Aruba a haci despues di COVID-19.
Puerto Rico a scoge pa crecemento sostenibel y reduccion di e tamaño di e pais; Aruba a scoge pa mas impuesto. No ta necesario pa menciona cu tur dos a aumenta nan debe nacional durante e dos eventonan. Kisas hopi ta cuestiona cu dicon mester compara Puerto Rico cu Aruba, pero e realidad ta cu e situacion di Aruba dificilmente por compara cu paisnan Europeo of cu cualkier otro region, como cu Aruba su factornan macro-economico ta diferente. Puerto Rico ta e pais cu mas similaridad.
Pa analisa algun accion cu Puerto Rico a tuma encuanto su desaroyo economico sostenibel, akinan algun punto:
- Promove Inversion Stranhero Direct (ISD) cu incentivonan fiscal.
- E Codigo di Incentivonan Contribuyento, conoci como Ley 60, ta diseña pa promove e crecemento di Puerto Rico cu inversion directo di stranhero. E ta exonera algun impuesto na inversionistanan cu establece of bolbe na Puerto Rico.
- Ley 22 ta un grupo di incentivo economico cu Gobierno di Puerto Rico a establece pa crecemento di e economia di e isla. E incentivonan adicional ta ofrece beneficionan unico na inversionistanan den sectornan di manufactura, hospitalidad y turismo, aseguro y banco internacional, servicionan di exportacion y agricultura.
- Conseho Stricto di Supervision di Merca. Pa confirma cu bo a logra un surplus fiscal durante e ultimo 4 añanan.
- Reduci tamaño di Gobierno. Privatisa!
- Net di seguridad pa esnan menos privilegia. Subsidio, especialmente di vivienda pagabel.
Mi tin di remarca cu esaki no ta nifica cu tur cos ta perfecto na Puerto Rico y cu nos mester copia nan plan. Absolutamente cu no! Su clase medio a wordo afecta hopi ya cu e salarionan a keda stanca pa hopi aña y e inflacion y e costo di vivienda a aumenta. Pero semper nos por siña di e factornan interesante di e caso di Puerto Rico y cu lo por beneficia Aruba.
Gobierno di Aruba tin razon pa ta preocupa cu GDP/capita ta disminuyendo. Kisas nan ta kere cu nos modelo di crecemento ta “kibra” of nan tin e percepcion cu entrada di turismo no ta filtra den nos economia. E problema no ta e modelo di turismo, cu ciertamente por wordo mehora. Pero tin multiple otro factornan, manera e crecemento di inmigracion, e subsidio “Imputation Payment Company” cu pa hopi aña no ta necesario mas. Actualmente, tambe mester tene na cuenta cu hopi Rubiano ya no kier traha den sector di Turismo mas, pa motibo di e oranan largo y traha den fin di siman. Hopi lo prefera otro sector of bira un empleado publico. Pero sin nos modelo di turismo “kibra”, nos economia lo ta mas manera di Haiti.
Un factor cu hopi bes nos no ta realisa ta cu nos GDP/capita ya disminui, ta e falta di inversion priva. Segun Banco Central, construccion y inversion priva na Aruba a cay 3 aña sigui, di 21,2 % te 18,5 % di nos GDP, den suma US$ 600 miyon aña pasa. Un motibo pa preocupacion y accion inmediato. Esaki NO ta pasobra hendenan no kier inverti, incluso den actividadnan no turistico, pero e realidad ta cu na Aruba ta hopi dificil pa haci negoshi, of casi imposibel, y inversionistanan, como tanto Rubiano y Stranhero, ta sinti obliga di haci inversion otro caminda cu no ta Aruba. Sigur sin menciona cu e burocracia excesivo y e tardansa pa tuma un decision ta un malesa cu ta afecta henter Gobierno, y e progreso di un pais.
Den un rosea positivo, apesar di basta contratiempo, nos economia ta dunando un buelta pa mihor. Pues den mi opinion humilde, no tin necesidad di mas impuesto por lo pronto. E enfasis mester ta na colecta e impuestonan atrasa di e sector informal, manera cierto mercadonan di cuminda y tiendanan cu no ta paga, of e personanan cu ta den e industria di Vacation Rental y cu no ta cumpli cu impuesto, segun e ley ca bin na vigor 9 aña pasa.
Esaki lo haci bida mas facil pa inversionistanan y promove ‘Inversion Stranhero Directo’ y kisas lo resulta pa 2024 den un BTW (Impuesto riba balor agrega) mihor pensa. Pero sin duda, mihor mas inversion priva y crecemento sostenibel cu mas impuesto!
