ORANJESTAD (AAN): E suplica ta sigui wordo pidi di pueblo, pa duna cooperacion y no lubida e muchanan cu ta sufriendo hopi durante e pandemia di Covid-19.
E pandemia ta sigui tin su impacto riba communidad y pesey mes recien e organizacion local di Kiwanis Club of Palm Beach a lanza e campaña ‘5 for Kids’, pa recauda fondo y sigui duna aporte na nos communidad, especialmente muchanan den necesidad.
Aña 2020 y 2021 a worde grandemente afecta pa Covid-19, y mayoria organizacionan voluntario na Aruba, incluyendo Kiwanis Palm Beach, mester a reinventa nan mes pa asina por sigui funciona y cumpli cu nan metanan proponi.
Den e cuadro aki e campaña actual, ‘5 for Kids’, ta uno innovativo, pues bo simplemente tin di manda un SMS, cu text 5ForKids, for di bo telefon cellular pa e number 250 riba Digicel of Setar NV pa haci un donacion di 5 florin.
Tur esnan cu ta contribui lo participa automaticamente na un sorteo semanal cu premionan fabuloso! E premionan aki ta varia di cena pa dos persona te na estadia den hotelnan local y otro articulonan exclusivo.
Tur fondo recauda lo worde dedica na donacion of proyecto social den nos communicad cu enfoque riba muchanan den necesidad. Ehempel di proyectonan ehecuta door di Kiwanis Club of Palm Beach ta inclui e proyecto di Watercoolers pa Schoolnan, Child Seat camapigns, ademas di donacionnan na un variacion di fundacionnan manera Cede Aruba, Hungateca, YMCA, Casa Cuna y mas.
Manera cu DIARIO a trece dilanti caba, tin chens ademas di haci e donacion via e app di Pay.aw
E campaña di “5 For Kids” lo core pa henter luna di mei.
Kiwanis Club of Palm Beach ta pertenece na e organizacion global Kiwanis Internacional cu ta un instancia caritativa dedica na haci nos mundo mihor door di cambia un communidad pa medio di un mucha cada bez.
