Estado di Derecho Aruba ta wordo pusha den uno di su retonan mas grandi
*AVP a tene accion den barionan pa Benny por a drenta Parlamento
*Casonan di kiosko, tereno pa apartamentonan ta orkesta pa serenada?
ORANJESTAD(AAN)—Ora ta papia di un Estado di Derecho ta papia di reglanan cu ta duna validez na un pais pa considera su mes democratico.
Kico ta democracia y con e sentido di “Ley pa Un ta Ley pa Tur” ta resona, si ainda Benny Sevinger no a entrega su retiro como Miembro di Parlamento di Aruba, como representante di AVP, cu e forza e exigencia pa Benny Sevinger durante su estadia den prison, wordo eligi como Miembro di Parlamento di Aruba.
Algo ta completamente robez den e desaroyonan politico na Aruba, cu sigur ta duna tur motibo pa preocupacion serio entorno e garantianan cu democracia ta entrega.
Con por ta posibel cu despues cu Corte di Husticia no solamente a duna sosten na e hecho cu Huez den tratamento di e caso di Benny Sevinger den prome instancia, a dicidi cu Benny Sevinger merece castigo di prison, Benny Sevinger ainda ta representa Aruba den Parlamento y ta ricibi pago pa cada dia di su trabou?
Con por ta posibel cu miemtras miembronan di Partido AVP, continuamente ta uza necesidad di pobernan den comunidad pa nan por haya voto, placa cu por wordo uza pa alivia hamber di pobernan, ta wordo uza pa paga Benny Sevinger, cu partido AVP y sigur e lider di partido AVP a exigi pa ta representante di Aruba den Parlamento aunke el a wordo sentencia na prison?
En resumen! Ora ta papia di democracia na Aruba, di kico ta papia si e sistema democratico di Aruba ta perde su balor ora ta trata casonan di corupcion, di abuso di Pueblo di Aruba?
Con AVP por enfrenta Pueblo di Aruba despues cu Mike Eman a sostene Paul Croes cu finalmente a resulta den prison y a exigi di Pueblo di Aruba, pa Benny Sevinger por ta den Parlamento di Aruba, e alma di democracia di Aruba?
Ni sikiera un disculpa a wordo presenta na Pueblo di Aruba for di AVP y Mike Eman, cu manera e mes a bisa ta e “back to back”di Benny Seveinger y hunto cu Benny Sevinger a impone e debenan di proyectonan Bo Aruba, cu a rementa ley, riba Pueblo di Aruba?
For di momento cu Gabinete Mike Eman a retira na 2017, Aruba a cuminsa tuma nota di casonan cu sigur mester a haya tur atencion.
No ta solamente den e caso Avestruz, acusacionnan cointra Benny Sevinger a bini dilanti.
Kico a pasa cu otorgamento di derecho di kioskonan cu a aparece com noticia durante basta tempo? Un noticia cu a ricibi hopi atencion dia cu Gobierno Mike Eman 2, mester a bandona e oficinanan di Gobierno pasobra Pueblo di Aruba a dicidi cu ta basta.
Na 2017, Aruba a wordo informa di e caso civil, caminda Huez mester a dicidi riba terenonan propiedad di Gobierno cu Sevinger como Ministro demisionario, pues ya na caminda di cas, a otorga contra ley?
Pendiente den Corte na e momentonan aki, tin e caso relaciona cu supuesto labamento di placa, cu a wordo posponi en espera di e sentencia di Corte di Husticia den e caso avestruz?
Na e momento cu e sentencia di Corte di Husticia a cay y Benny Sevinger a wordo prohibi pa asumi encargo publico na Aruba, AVP mester a percura pa Benny Sevinger entrega su retiro den Parlamento ya cu ta como representante di partido AVP e ta Miembro di Parlamento cu un salario mensual y tur otro beneficio financiero cu Pueblo di Aruba, ta paga.
Cuanto e caso Avestruz riba su mes pa loke ta trata investigacion y persecucion a costa Aruba?
Un pregunta cu ta keda habri mientras e Estado di Derecho Aruba ta tambalea mientras, a base di exigencia di AVP, Benny Sevinger ta probecha di e beneficionan di Representante di Pueblo di Aruba den Parlamento cu ta wordo cubri cu berguensa!
