ORANJESTAD (AAN): Pueblo no a reacciona bunita ora cu a bira conoci cu Diasabra anochi a tuma lugar un fiesta hopi luhoso riba un isla priva, cu Premium Bar, Banda Musical, buffet extenso di cuminda incluyendo Grilled Steak, tambe Prime Rib, Calacuna, Ham Horna, cu a costa $45 pa persona.
Publico a keda babuca pa mira cu esaki tabata un fiesta luhoso, organiza pa AZV. Si, e
mesun AZV cu awor no ta pagando mas pa hopi remedi cu bo tin di busca na Botica.
E informe aki a wordo treci dilanti riba Social Media door di e fraccion di Accion21 cu a logra haya copia di e work-order pa e fiesta aki di 115 persona.
Segun e calculo di Miguel Mansur, e fiesta aki di e Christmas Party Luhoso aki a sali riba di 40 mil Florin. Y aki Mansur no a ni conta acerca e gasto di banda musical, ni e gasto di monton di Plaquette di Cristal cu wordo busca pa otorga na personanan.
“Mientras pueblo asegurado mester sufri recorte den remedi y servicio, mientras profesionalnan y industria medico mester sufri recorte den compensacion... AZV tin Christmas party cu un gasto di mas cu 40.000 Florin.”
Segun e fraccion di Accion21, na premium bar so AZV a gasta 16.000 Florin. Na cuminda a gasta casi 11.000 Florin. Tambe a paga 2.600 Florin na un Bar Sin Alcohol di 1 ora na comienzo di e Fiesta. Mansur a indica cu e gasto total ta di 40.504 Florin. Pero ainda e no a pone prijs di e banda musical, ni extra gasto.
Segun e parlamentario, danki na esaki pueblo ta mira con AZV ta gasta placa.
Si acaso e banda musical a cobra 4.000 Florin, bo ta nota pues cu e fiesta aki di AZV kizas lo a yega 45.000 Florin. Esey ta yega na un costo di 391 Florin pa cabez.
Varios ciudadano a reacciona, mustrando cu si AZV a tene nan Cena di Pasco na cualkier restaurant local, nan lo a paga kizas ni 7.300 Florin pa 115 persona. Eynan e lo a sali djis 63,50 Florin pa cabez.
Tur esaki ta placa cu nan a haya di BAZV? Pero e ta un ehemplo claro di con cuido medico ta debilitando, pero esnan cu tin di cuida nos placa ta organiza fiesta luhoso. Riba Diadomingo DIARIO a tuma nota cu un persona envolvi den un grupo di NGO na Aruba, a describi e fiesta aki similar cu e conocido palabra “Feestvierend ten Ondergaan”.
