Na momento cu e saluda dirigentenan internacional na Aruba
*Na Juni 2019 na Sint Thomas el a splica e menasa di clima
*Creacion di prosperidad ta exigi pa atende cu menasa natural
ORANJESTAD (AAN) —Awe Aruba ta den noticia mundial atrobe. Lidernan di cantidad di pais ta bini hunto pa atende cu un asunto cu DIARIO a duna tur atencion durante e ultimo añanan debi na e impacto cu e lo tin pa hende directamente.
Cambio di clima kico e ta nifica pa cada persona, cu mas y mas ta comprende cu algo serio ta tuma lugar na mundo?
Na Aruba e calor ta bira casi insoportabel. Un calor desconoci realmente na e luna di Mei.
Cu algo ta pasando, ta bira conoci pa ciudadanonan cu ta acerca DIARIO pa e manifestacion di un biento fuerte y lama bruto , cu ta alerta cu poco poco nos ta yega e fiesta di San Juan, cu ta hiba nos na temporada di horcan.
Presion halto di biento, cu awe ta causa e biento fuerte, ta algo cu semper a percura pa refresca hende bou e solo tropical. Pero situacion a cambia y e forma cu horcannan a manifesta nan mes sigur na 2022, tin hopi hende pendiente pa e temporada di horcan.
Ta den e situacion di e menasa grandi cu condicionnan di tempo ta forma pa e paisnan den nos region y sigur pa e islanan chikito, Prome Ministro Evelyn Wever-Croes ta bolbe bini dilanti como lider na un nivel internacional.
E forma cu mundo a acepta e nivel halto di liderazgo di Prome Ministro Evelyn Wever-Croes no ta relaciona cu un postura di politico cu kier haya atencion y popularidad pa haya mas voto.
Atrobe mr. Evelyn Wever-Croes ta duna mundo prueba cu e ta un gobernante di calidad cu a percura pa habri portanan nobo pa Aruba pa asina su calidad como lider percura pa un calidad segun e concepto mas intimo di democracia, pa tur hende.
Mundo ta reuni awe na Aruba pa papia di e peliger di cambio di clima pa islanan chikito.
No ta prome bez cu Prome Ministro Wever-Croes ta mustra riba e resultadonan cu desastrenan natural tin pa un comunidad.
Dia 4 di Juni 2019, na Sint Thomas su voz a resona durante e conferencia di Recuperacion Despues di Horcan, cu a wordo organisa pa Clinton Global Initiative.
Na 2019, Prome Ministro Wever-Croes, den pleno planificacion di recuperacion financiero di Aruba den e lucha contra debe nacional cu el a hereda, a papia di e necesidad pa region di Caribe wordo bon prepara pa asina e tin e forsa necesario pa por enfrenta condicionan desastroso di tempo enfrente e menasa di cambio di clima.
Mihor infrastructura, reglanan di maneho y sistemanan nobo ta loke a keda presenta na e momento cu hunto cu ex Presidente Mericano, Bill Clinton, el a atende e posibilidadnan pa empresanan chikito den nos region.
For di momento cu el a duna inicio na su tarea como Prome Ministro di Aruba, mr. Evelyn Wever-Croes a entrega prueba na Aruba y na mundo, cu e no ta papia solamente pero cu e ta haci.
El a enfrenta debe nacional, a enfrenta Covid-19, crisis di petroleo y Guera di Ukraine, practicando un actitud di honestidad cu Pueblo pa asina por a traha na e recuperacion di Aruba.
DIARIO semper a mustra cu e reto mas grandi cu Prome Ministro Wever-Croes lo mester enfrenta lo ta e cambio di clima, cu ta exigi responsabilidad y union mundial pa scapa e hende for di desaster cu naturalesa ta prepara.
Awe Prome Ministro Evelyn Wever-Croes ta bolbe duna e prueba na Aruba cu e no ta un lider cu ta papia. E ta un lider cu ta actua.
Aruba ta centro di un conferencia cu ta haci posibel pa hunto discuti y enfrenta e menasa mas grandi cu hende por enfrenta.
Hende por pone un fin na guera, pero hende no por dicidi pa naturaleza a menos cu hende preveni pa naturalesa reacciona riba e desaster cu hende ta causa.
Hunto cu Hulanda, Prome Ministro Evelyn Wever-Croes ta saluda islanan chikito y henter mundo, pa asina cuminsa hunto contesta e peliger di naturalesa, cu cambio di clima a bira despues cu hende a lubida cu sin naturalesa e no tin felicidad.
