ORANJESTAD (AAN): Siman pasa, Colegio EPI unit S&S su Studentenraad a organiza un evento di chekeo di salud, conoci como “EPI S&S Health checkups”.
E tabata un momento pa haci chekeo di salud (Health checkups) na EPI unit Salubridad y Servicio. Pa 10:30’or di mainta a cuminsa y studiante y docentenan a para den rij y a hasi e checkeo. Pa 11:00 am a termina cu e chekeo nan.
Pa e evento tabata tin boluntarionan docentenan di enfermeria cu studiantenan cu a ehecuta e controlnan. Tanto Janine y Cher a guia studiantenan Jasmine, Celianne y Mina (vice presidente di Studentenraad) pa a haci checkup di presion di sanger, control di suco den sanger y BMI Index (e peso y haltura). Esnan cu a hasi e chekeo por a uza nan telefoon pa controla nan BMI y nan a registra nan informacion y asina weita e resultado. Ora a termina cu nan chekeo nan a haya un pida mandarin y cu nan resultado den nan man.
Aki algun comentario di studiantenan: “Juffrouw esaki ta mi promer biaha cu mi ta hasi esaki. Mi ta mas conciente awor di mi salud. BMI y midi sucu mi a siña kico e ta.”
Otro a bisa: “Juffrouw con mi por midi e BMI? Cu su smartphone a bise busca BMI Calculator y yene.
Great mi por bay hasi esaki na cas tambe. Danki.” Un otro a bisa: “Juffrouw mi a consulta cu mi mayornan ayera encuanto cu tin health checkups gratis na school y mi a puntra kico mi hasi participa of no?” Su mama a contesta bay haci’e asina bo ta haya sa mas.
Tambe uno a comenta: “Juffrouw mi a keda sin come pa bini hasi e health checkup aki. Mi resultado ta bon! Mi ta hopi contento.”
Colegio EPI unit S&S studentenraad ta pone den practica e importancia di su comunidad ta saludable. Masha pabien cu e proyecto exitoso aki.
