Situacion solido financiero ta exigencia for di nacemento di e pais --- Aumenta entrada directo y indirecto como balansa pa baha gasto --- Den un crisis mundial Aruba ta habri porta pa recuperacion economia
ORANJESTAD (AAN)- Un Pueblo cu un bon gobernacion, ta tene su gastonan den cuadro di e limitenan cu su entrada ta exigi y ta aumenta su entrada.
Esaki ta e contenido tambe di exigencianan di Hulanda cu for di momento di nacemento di e pais Aruba, a exigi un base financiero y economico solido.
E punto aki ta marca un linea cora den e lista di exigencianan di Hulanda cu for di 1986 a duna muestra cu Aruba mester di un economia fuerte y sin riesgo pa e por mantene su mes como pais autonomo den Reino.
Ora Aruba a duna inicio na e sistema di garantia pa habri caminda pa turismo, Hulanda a interveni y a exigi pa deshaci di tur riesgo grandi cu e sistema di garantia pa proyectonan den turismo, tabata contene.
Exigencianan Hulandes, den cuadro di e Statuut cu ta goberna relacionnan den Reino, a continua y por mira e establecemento di Wyatt y Valero na Aruba pa reforsa economia basa riba turismo, cu ta un economia sumamente vulneral, manera a keda demostra na 2020 ora e Coronavirus nobo a ataca.
Den e mundo instabil na entrada di Siglo 21, negoshi di refineria tabata dificil y mundo a cuminsa presta mas atencion na gas.
Refinerianan di petroleo tabata somete na proyectonan cada bez mas exigente di clima y un proyecto di refineria cu futuro pa Aruba, ta nifica cu mester deshaci di e refineria bieu cu pa colmo no ta un refineria completo.
Cu cambio di Gobierno na Venezuela, Aruba a perde un cantidad grandi di turista di Venezuela, cu prome cu Chavismo tabata produci un cantidad importante di turista cu ta gasta placa na Aruba.
For di 2017 Aruba mester a cuminsa diversifica su turismo y habri mercadonan nobo, pero na mes momento cuminsa busca forma pa diversifica su economia total, cu a faya cu e proyecto sumamente riesgoso di Citgo cu ta propiedad di Venezuela pero te awe rehen financiero di e conflicto estatal na Venezuela.
Na momento cu Gobierno Wever-Croes a asumi poder den un situacion hereda di bancarota cu tabata exigi pa baha gasto, tabata conoci cu mester crea entrada nobo pero sin margen di riesgo manera tabata e caso di Citgo, cu a bira un fracaso cu a wordo pronostica riba tereno internacional di negoshi.
DIARIO a guia su lectornan cu informacion corecto di e situacion di Aruba, cu a rementa na 2020 ora e pandemia a deshaci di economia di Aruba.
Prome Ministro Wever-Croes a wordo forsa di yega na un acuerdo nobo cu Hulanda pa un prestamo cu hamas Aruba por a mira adelanta, pasobra e prestamo cu Hulanda tabata contene e resultado di Covid-19 tambe.
Hulanda, mescos cu tur experto financiero y economico mundial cu ta asisti Aruba, a mustra cu Gobierno mester baha su gastonan pero tambe mester aumenta su entradanan.
Gobierno Wever-Croes pues mester a percura pa un economia nobo y diversifica, den cual inversionnan importante ta ensancha e base economico, financiero y social.
E anuncio di entrada di Eagle LNG tabata mas cu anuncio di entrada di gas pa baha gasto di awa pa Pueblo di Aruba.
Eagle LNG ta representa un negoshi di gas den Caribe, caminda e demanda di gas ta aumenta mescos cu ta e caso rond mundo.
Gas ta hunga hasta un papel importante pa atrae un refineria, manera ta wordo negocia pa Aruba tambe.
Informacionnan concreto di DIARIO ta indica cu entrada di Eagle LNG ta habri caminda pa entrada di Quanten, cu lo opera cu gas pero na un refineria nobo.
Na momento cu Aruba firma e contracto awe cu Eagle LNG, porta ta habri pa e placa necesario pa restablece economia y situacion financiero di Aruba, drenta.
Prijs di awa y coriente lo baha na porta di 2022, cu mundialmente ta priminti di causa inflacion pero cu Aruba lo por contra cu un prijs mas abou di awa y coriente.
Eagle LNG ta honra e exigencia di Hulanda pa no solamente baha gasto pero tambe pa aumenta entrada di placa pa sostene economia di Aruba, cu awe ta drenta un epoca nobo na momento cu crisis mundial ta escala.
Historia di Aruba ta conoce un pagina nobo awe cu entrada di un negoshi internacional, cu ta nifica entrada pa Aruba cu un economia reforsa pa entrega Pueblo un miho futuro.
Expertonan ta mustra cu entrada di Eagle LNG ta habri porta pa mas industria tambe, cu den e situacion mundial nobo kier gas como su combustibel.
