Rishma Tromp di Amelia Care Services
ORANJESTAD (AAN) – Amelia Care Services, un centro di cuido pa adultonan mayor, ta un di e institucionnan cu a participa den e proyecto di planta mata organisa pa Directie Ouderenzaken.
Segun señora Rishma Tromp di Amelia Care Services, e iniciativa ta di gran balor pa e centro, ya cu lo brinda adultonan mayor un actividad adicional cu ta stimula nan bienestar fisico y mental. El a splica cu hopi di e clientenan ta gusta mata y hardineria, y cu planta y cuida mata ta contribui na mantene nan movilidad, coordinacion di man y actividad fisico.
Amelia Care Services ta ofrece cuido residencial pa un maximo di 11 residente. Ademas, den colaboracion cu Pasadia 60+, e centro tambe ta funciona como un pasadia, ricibiendo adultonan mayor di dialuna te diabierna, di 8:00 di mainta pa 4:00 di atardi.
E centro ta organisa diferente actividad enfoca riba e bienestar fisico, mental y social di su participantenan. E proyecto di planta mata ta complementa e programanan existente, ofreciendo un oportunidad pa sali pafo, disfruta di solo, planta y cuida mata y, segun cu el a expresa, mas despues a adultonan mayor por disfruta di e parhanan cu lo acerca pa bin para riba e matanan.
Segun señora Tromp, actividadnan asina no solamente ta promove movimiento, sino tambe contribui na mehora e estado di animo di e adultonan mayor.
Señora Tromp a enfatisa cu ta esencial pa adultonan mayor keda activo y participa regularmente den e actividadnan cu e centro ta ofrece. Segun e, e momentonan di interaccion social y actividad fisico ta contribui significativamente na un miho calidad di bida y ta yuda nan mantene un estilo di bida mas activo y independiente.
