Director di DOW Marlon Croes:
*Esaki ta core di Riu Antillas pa Soul Beach Malls
ORANJESTAD (AAN) – Manera ta conoci DOW tabata tin un destaho publico den e transcurso di 2023, pa e caminda dilanti di e hotelnan high rise, cual ta core for di Riu Antillas Aruba pa e malls di Soul Beach. Den entrevista cu DIARIO, ing. Marlon Croes a informa esaki y a indica cu esaki ta e prome fase.
E trabao a wordo otorga na Arubaanse Wegenbouw, y nan ta den proceso di bestel tur e tuberianan y material cu mester pa inicia e trabao, y e meta ta cu na April venidero lo cuminza ehecuta e trabaonan di construccion aki.
“E reto di mas grandi ta cu nos tin cu tene cuenta cu e hotelnan, pasobra nan tin cu keda operacional y accesible. P’esey, e team ta trahando un plan y den Directie, siman pasa, por a informa cu e plan a ahusta, ta cla y nan ta bay ta present’e e siman aki of otro siman, na AHATA cu e hotelnan, pa nan ta na haltura con e ta bay tuma lugar”, director di DOW a duna di conoce.
Croes a subraya cu den e caso aki ta solamente e tuberia bao caminda y asfalt cu mester drecha. E di dos fase cu ta core for di Soul Beach te cu Holiday Inn, ta similar, pero e fase 3 ta embeyecimento, y crea mas area pa e peaton por cana.
“No solamente dilanti hotelnan, pero tambe na e otro banda di caminda lo bin un ‘walk way’ por completo y nos lo bay restructura e stacionamento cu tin, por ehemplo, dilanti Riu Palace, cu ta den santo, anto ta bay regula esaki”, Ing. Croes a subraya.
El a agrega cu loke ta bay sosode ta cu DOW ta bay mehora e calidad di caminda, traha riba e tuberia di awa di yobida, di riolering cu ta bay pa e planta y tambe e return leiding di e planta pa e area pa den futuro, ora cu e planta produci awa di calidad cu por uza pa iriga e matanan, e vegetacion cu tin den e area aki.
Tocante e costo di e proyecto aki, e prome y di dos fase ta cubri pa gobierno y e di tres fase ta un contribucion manera ATA y AHATA ta menciona, cual ta e parti di embeyecimento pa hisa e producto turistico.
Encuanto e ruta e lo keda cu tur dos direccion, Marlon Croes a señala, pasobra e por ta contraproducente haci cambio, por ehemplo pa bin cu un solo direccion.
Pa aña 2026 e proyecto aki mester ta completamente cla, el a subraya, kiermen incluyendo fase 3.
