Minister di Turismo ta anuncia:
ORANJESTAD (AAN): Diahuebs mainta minister di Turismo y Salud Publico sr. Dangui Oduber a inicia e conferencia di prensa na San Nicolas pa anuncia e acuerdo cu a firma entre Fundacion Artisa, sr. Tito Bolivar y TPEF (Tourism Product Enhancement Fund) pa finansa e proyecto di Aruba Mural Festival cu ta forma parti di Art Week.
Di 2018, Ministerio ta dunando sosten financiero na e proyectonan sumamente exitoso di Fundacion Artisa. Minister Dangui Oduber ta menciona cu desaroyonan y eventonan di San Nicolas semper ta un prioridad pa sigui transform'e den ciudad cultural, cu ta conoci pa ta e art capital den caribe. Semper e meta tabata ta pa San Nicolas ta un ciudad cu hopi potencial cu por atrae e cantidad di bishitante y crea mas trafico y oportunidad den e sector turistico.
Minister Oduber tawata tin un vision cla pa cu San Nicolas y a percura pa cu esaki wordo refleha den su maneho. Di aña 2018 a cuminsa ehecuta varios proyectonan. Den e maneho di Minister Dangui Oduber diferente proyectonan y eventonan pa San Nicolas ta andando manera:
Baby beach fase 1 cu 2 a wordo entrega y dentro di poco cu lo cuminsa cu fase 3.
Proyecto pa embeyece y organisa Rodgers Beach.
Renobacion trapi di Rodgers Beach
Reapertura di Visitor informacion Center di ATA.
Tours di atraccion pa arte y murals.
Island Festival unda turista y nos localnan por bin Pariba di Brug y disfruta di cuminda autentico y nos musica local.
E partnership di TPEF cu Fundacion Artisa ta uno di importancia, como semper TPEF su fondonan ta pa financia diferente proyectonan manera embeyecemento, conscientisacion y proyectonan pa cultura y arte. Minister Dangui Oduber ta contento cu proyectonan asina y cu ta atrea y promove San Nicolas. Tin diferente eventonan den Art Week cu lo tuma luga den e siman di 2 pa 8 di September cu ta Aruba mural festival, Art Table, Art Talk, Art Fashion y Art Fair.
Turismo ta nos unico pilar economico y e crecemento di turismo ta nos entrada principal. Minister Dangui Oduber ta menciona cu su vision y accionnan ta pa Aruba tin un turismo sostenibel y esaki ta inclui un maneho responsabel pa sigui mitiga y regula ariba e cantidad di desaroyo di hotels y vacation rentals. E enfoca pa atrae e turista afluente y sigui enfoca ariba calidad y no cantidad di bishitante.
Finalmente, Minister Dangui Oduber kier gradici full e ekipo di fundacion di Artisa y TPEF pa boso esfuero pa sigui converti San Nicolas den un ciudad cultural. Danki na proyectonan manera Art Week ta atrae mas trafico pariba y pa asina San Nicolas tambe por florece den un area turistico.
