Prome Minister Evelyn Wever-Croes:
*Departamentonan di gobierno concerni cu desaroyo lo ta presente durante e reunion
ORANJESTAD (AAN): Prome Minister Evelyn Wever-Croes a reuni cu e presidente nobo di San Nicolas Business Association (SNBA), sr. Errol de Freitas riba diferente tema di interes comun. Prome Minister a indica cu desde inicio di Gabinete Wever-Croes e contacto cu SNBA tabata uno riba un base regular, mirando cu SNBA ta un partner importante y strategico pa loke ta trata desaroyo di San Nicolas. Un di e temanan cu a wordo trata durante e reunion tabata e peticion di SNBA pa tene e siguiente Conseho di Minister na San Nicolas. Esaki segun Prome Minister ya caba tabata riba agenda pa comienso di December 2022.
Durante e gobernacion di Gabinete Wever-Croes I y II, varios reunion di Conseho di Minister a wordo teni caba na San Nicolas. Durante e reunionnan aki, inversionistanan ta duna un presentacion na e ministernan presente riba nan interes y plannan pa inverti den San Nicolas. Tambe ta indica e tipo di ayudo cu ta rekeri di gobierno y ta delibera cu SNBA riba aspectonan importante pa nan, pa yuda e desaroyo di San Nicolas.
Presidente di SNBA, sr. Errol de Freitas
Sr. Errol de Freitas a tuma e oportunidad pa gradici Prome Minister pa e atencion cu e tin pa cu SNBA. Segun sr. de Freitas, esaki ta pone miembronan di SNBA sinti nan mes confortabel cu gobierno tin interes pa papia y dialoga riba oportunidadnan di desaroyo pa San Nicolas.
Sr. de Freitas a indica cu e reunion a bay den bon ambiente y a bay di acuerdo pa tene e siguiente reunion di Conseho di Minister na San Nicolas. Esaki ta brinda e oportunidad pa yega mas cerca di decisionnan pa loke ta trata proyectonan cu ta den proceso, cu falta pa termina y esnan na caminda. SNBA a haci e peticion na Prome Minister pa invita e departamentonan di gobierno concerni cu desaroyo pa ta presente durante e reunion.
Pa conclui, Sr. de Freitas a expresa di ta optimista pa e futuro desaroyo di San Nicolas. Prome Minister tambe a expresa cu e tabata un bon reunion y cu gobierno lo sigui traha hunto cu SNBA pa logra e desaroyo cu ta buscando den San Nicolas.
