ORANJESTAD (AAN): Sharline Koolman di Departamento di Salud a splica cu kico ta e protocol ora cu un persona haya Covid-19.
El a bisa cu actualmente e protocol cu DVG tin ta pa personanan cu no a vacuna cu ta bay den cuarentena. Nan ta wordo yama door di e team di DVG y nan ta guia e persona y bise kico e tin cu haci.
Esnan cu ta den isolacion, nan tin cu keda nan so den nan camber y mester percura pa tin menos contacto posibel cu cualkier otro miembro di famia, a remarca, vacuna of no vacuna.
Segun Koolman, esnan cu ta den cuarentena ta keda cas.
Pakico ta hacie e diferencia entre vacuna of no vacuna te aworaki? Pasobra ta algo cu por cambia tambe, ta pasobra ta mira cu tin hende cu a vacuna y algun di nan ta haya sintoma y esey no ta nada straño.
E persona cu ta vacuna no lo bira asina malo cu mester di un asistencia medico of un cuido intensivo of cu el a fayece, el a enfatisa.
Aworaki e protocol ta bay pa tur esnan cu ta na cas, cu ta den isolacion, nan mester nan mes den isolacion. Haci e parti di higiene di bo cas mas tanto cu ta posibel. Habri bentana di camber pa e ventila.
Si tin mucha na cas, haci un areglo cu miembronan di e famia pa e muchanan no keda na cas tanten cu ningun di nan ta infecta of tin sintoma. Te cu aworaki e muchanan te cu 12 aña no tin e privilegio pa wordo vacuna, Sharline Koolman a duna di conoce.
