Departamento di Salud:
ORANJESTAD (AAN): Den e edicionnan anterior a enfoca riba JGZ su maneho, e areanan di salud y bienestar (emocional, mental y fisico) di e mucha y hobennan den edad di 0-25 aña aki na Aruba ta pidi mas atencion.
Proteha tur mucha y hoben den tur sentido (contra malesa infeccioso, pandemia, abuso etc.) ta un di e derechonan di mucha fundamental.
Awe JGZ lo elabora riba un aspecto importante di su maneho, cual ta proteccion di tur mucha y hoben aki na Aruba contra malesanan infeccioso. Aki ta papia di malesanan manera polio, difteria, tetanus y sarampi. Malesanan cu awendia no ta wak mas na Aruba danki na e Programa Nacional di Vacunacion cu ta existi desde 1957.
E programa a contribui enormemente pa promove y proteha e salud di tur mucha, hoben y adulto bibando na Aruba.
𝐄 𝐯𝐢𝐬𝐢𝐨𝐧 𝐝𝐢 𝐉𝐆𝐙 𝐫𝐢𝐛𝐚 𝐩𝐫𝐞𝐯𝐞𝐧𝐜𝐢𝐨𝐧 𝐭𝐫𝐞𝐦𝐩𝐚𝐧 𝐜𝐨𝐧𝐭𝐫𝐚 𝐦𝐚𝐥𝐞𝐬𝐚𝐧 𝐢𝐧𝐟𝐞𝐜𝐜𝐢𝐨𝐬𝐨:
Pa JGZ ta hopi importante cu cada mucha y hoben na Aruba ta keda bon proteha contra malesanan infeccioso pa asina evita un impacto negativo riba nan bienestar, desaroyo y salud general.
JGZ ta encarga cu e Programa Nacional di Vacunacion pa vacuna muchanan entre 0 y 12 aña den colaboracion cu Wit Gele Kruis. E meta ta pa duna proteccion contra malesanan infeccioso y asina promove bienestar y salud di tur mucha, hoben y adulto na Aruba. Vacunacion a demostra di mehora nos calidad di bida, reduci casonan y mortalidad di malesanan infeccioso den e ser humano.
Vacunacion ta yuda fortifica defensa di e curpa y asina preveni complicacionnan serio di algun malesa infeccioso. Un grado halto (95%) di vacunacion bou di muchanan tambe ta proteha e poblacion en general, mas tanto esnan vulnerabel cu no ta vacuna of pa ken vacuna no tabata efectivo.
E atencion pa prevencion y combatimento di malesanan infeccioso a cuminsa for di cuminsamento di siglo binti. Asistencia na scol tabata wordo afecta door di malesanan infeccioso y malnutricion.
Na 1916 a introduci e ordenansa di vacunacion contra viruela (pokken). Den e ley aki ta stipula cu pa admiti un mucha na scol mester a presenta cu e prueba di vacunacion of e mucha mester a haya e malesa infeccioso aki caba. Na 1980 Organisacion Mundial di Salud (WHO) a declara cu viruela (pokken) a wordo eradica y mundialmente a stop cu vacunacion contra esaki.
Esaki tambe a sosede cu polio. Ya pa 38 aña, e region Caribense ta liber di polio y otro malesanan infeccioso manera sarampi, rubeola (rodehond), cual pa decadanan no ta existi mas. JGZ lo kier mantene esaki y pesey lo sigui inverti den organisa programanan di vacunacion den nos region caminda lo percura pa tin un cobertura halto di vacunacion.
Den un otro articulo lo sigui elabora riba e tema importante aki.
