ORANJESTAD (AAN): Informacion for di Hulanda ta indica cu algun luna pasa Proskuneo NL a lansa su prome EP entitula “The One”.
Esaki seguramente tabata di gran bendishon pa hopi hende.
DIARIO a compronde cu awor Proskuneo NL ta cla pa nan di dos EP cu ta worde lanza e siman aki mes. E ta un extended play (EP) cu cancionnan cu lo trece gozo, paz y speranza pa cada uno. Cancionnan cu diferente ritmonan gozoso manera ritmo combina, zouk, bolero, salsa y zouk.
E prome cancion titula “Hesus” a worde componi y aregla pa Chante Richardson y Wilmar Mook, y interpreta pa Chante Richardson.
E di dos cancion titula “Speranza” a worde componi pa pastor Chesron Richardson, aregla door di Wilmar Mook, interpreta pa Chante Richardson y pastor Chesron Richardson. E di tres cancion a worde componi y interpreta pa Solange Pietersz Camelia y ta titula “Poderoso Dios”. E cancion a worde aregla door di Jeanine Richardson.
E ultimo cancion titula “Su binida” ta unu cu a worde componi y aregla pa Clifton Hariquez y intrepeta pa pastor Chesron Richardson.
E EP aki seguramente lo ta uno diferente y cu lo ta di gran bendicion pa un y tur. Esakinan lo ta cancionnan cu lo trece paz den tormenta, speranza caminda no tin, y gozo caminda tin tristeza. Esaki ta e conviccion y oracion.
Proskuneo NL su meta ta pa sigui halza e Rey y Salbador Cristo Hesus atravez di musica.
