Ronella Croes, CEO di ATA - ORANJESTAD (AAN): E turistanan mericano cu ta viaha pa Aruba por haci uso di e asina yama 'Smart Health Card' y 'CommonPass' pa por drenta Aruba.
Esaki ta un plataforma cu ta bin wordo uza for di basta luna pasa y aworaki e ta un di e hermentnan indispensabel pa e turistanan mericano cu ta vacuna por drenta Aruba sin cu mester di entrega un PCR Test negativo.
Ronella Croes, CEO di Oficina di Turismo a duna di conoce cu ta tin otro conversacion ta tumando lugar caba no solamente cu otro plataformanan fuera di 'Smart Health Card' y 'CommonPass' na Merca, pero cu plataformanan entre otro na Europa unda cu sa tin desaroyonan ta tumando lugar riba nivel di Union Europeo. Aki ta papia di e 'Digital Covid Certificate'.
Esaki ta aspectonan cu ya caba ta den planificacion y asina cu keda cla cu esakinan lo anuncia esaki debidamente, Croes a señala.
Ya caba Crisis Team a aproba cu e Ministeriele Regeling cu ta acapara tur loke ta Covid tin den dje indica cu plataformanan digital cu por acepta y por wordo uza pa valida e prueba di vacunacion y aproba door di Departamento di Salud (DVG), cu Aruba por habri gradualmente conforme ta drenta den acuerdonan y aproba diferente di e plataformanan aki, e ehecutivo di ATA a splica.
Aruba a bay den e prome paso, cual ta acepta e entrada di e mericanonan cu a vacuna pa medio di e proceso di e 'Smart Health Card'. Siguiendo e proceso aki e bishitantenan completamente vacuna por wordo exonera di haci e PCR Test.
Tur informacion ta obtenibel riba aruba.com y ta urgi tur esnan interesa pa bishita e website aki pa asina nan por tin tur e informacion pa e bishitantenan cla pa por haci uzo di dje, Ronella Croes a declara den conferencia di prensa.
Esaki ta un flexibilisacion importante y ya caba hopi pais tin un grado halto di hendenan vacuna y no obstante e tendencianan pa loke ta e mercado mericano y e variante delta, cu e mercado mericano ta categorisa aworaki como un mercado di risico abao pa Aruba y como tal por tuma e tipo di decisionnan aki tambe di un cambio di maneho pa esnan completamenbte vacuna, a remarca.
Lo sigui traha riba e parti di seguro y pronto lo bin cu informacion riba e rebaho exacto di e tarifa di seguro cu ta rekeri pa tur bishitante cu ta drenta Aruba, a bisa.
