Cambionan grandi na caminda
ORANJESTAD (AAN): Durante un conferencia di prensa convoca Diamars mainta na sede di DVG den Caya ing. Roland Lacle, oficialmente nan a anuncia e maneho nobo di AruBIG cu lo bay drenta na vigor pa tur psicologo y enfermero tambe na Aruba.
Jurette Croes durante e conferencia di prensa, a introduci Jayburtt Dijkhoff, PhD kende ta Cabezante di Instituto di Calidad (‘Kwaliteitsinstituut’) kende a amplia riba e topico aki.
AruBIG lo bay drenta na vigor pa enfermeronan, y esaki ta un grupo hopi grandi. Nan lo registra esnan cu a bira enfermero specialisa cu diploma obteni na Hulanda, Belgica, Canada, Merca, y Filipinas tambe.
DIARIO a compronde cu tin problema ainda cu diploma di enfermeronan cu a gradua na Suriname, pero e tin atencion y toch posible solucion.
Pa nan tambe lo tene un Town Hall Meeting, pero como cu e parti di enfermeronan (‘verpleegkundigen’) ta un grupo asina grandi, DVG lo bay haci esaki a base di invitacion personal y lo tene esaki na un otro localidad. Lo invita e ora tur e organizacionnan cu ta representa e Enfermeronan, of e organizacionnan cu ta tuma e Enfermeronan aki den servicio, y na nan turno nan lo hiba e informacion aki bek na e grupo.
AruBIG lo bay registra como 700 profesional: Jayburtt Dijkhoff a splica cu ta importante pa haya feedback di e enfermeronan riba loke ta e necesidadnan local, pa asina por contesta preguntanan y si ta necesario, haci ahuste den e siguiente Decreto Nacional prome cu AruBIG por drenta na vigor pa enfermeronan.
Como cu ta un grupo grandi, DVG ta pidi pa asisti na e presentacion aki. Nan ta calcula cu pa comienzo di 2024 ora cu e Decreto Nacional drenta na vigor, nan ta calcula cu un grupo di como 700 profesional lo bay wordo registra total den AruBIG.
E ta un grupo grandi, y ta trahando duro pa acomoda e grupo grandi aki, pero ta sperando pa haya feedback di e profesionalnan pa cu preocupacion of indicacion. Keda pendiente pa e Town Hall Meeting pa enfermeronan cu lo tuma lugar dentro di 2 siman.
