Consul di Colombia Gustavo Serrano Amaya:
ORANJESTAD (AAN): Consulado di Colombia na Aruba lo organisa su di dos campaña di salud gratis, cu e meta di brinda atencion medico na conciudadanonan Colombiano cu no tin seguro medico AZV. Segun consul Gustavo Serrano Amaya, e iniciativa ta sigui e exito di e campaña cu a wordo realisa aña pasa.
E campaña lo ofrece 300 cupo pa examennan di laboratorio y consulta medico completamente gratis. Ademas, tambe lo tin 500 cupo disponible pa limpiesa dental. Pa e limpiesa dental ya por regirstra online.
Serrano Amaya a indica cu den e siguiente dianan e Consulado lo anuncia oficialmente e campaña di salud, publicando tur informacion, formulario di inscripcion y e link cordespondiente riba su pagina di Facebook. Esnan interesa lo mester registra online, preferiblemente uzando e formulario digital of e codigo QR cu ta simplifica e proceso di inscripcion. Despues di registra, cada participante lo ricibi un cita cu e personal medico.
Segun e consul, e programa ta dirigi principalmente na Colombiano cu no tin cobertura di AZV. El a enfatisa cu esnan cu tin permiso di DIMAS pero ainda no tin acceso na seguro medico tambe por beneficia di e servicio.
“Nos ta continua cu e trabou cu nos a cuminsa aña pasa. Ya por inscribi pa e limpiesa dental, y pronto tambe lo por haci esaki pa consulta medico y examennan di laboratorio,” Serrano Amaya a declara.
E Consulado ta invita tur Colombiano pa ta atento na pagina oficial di Facebook di Consulado Colombiano, unda lo publica e fecha di apertura di e inscripcion y tur detaye tocante e campaña.
Cu e iniciativa aki, e representacion diplomatico ta busca amplia acceso na cuido di salud preventivo pa un parti importante di e comunidad Colombiana residente na Aruba.
