ORANJESTAD (AAN) — Den conferencia di prensa, dialuna, Prome Minister Wever-Croes a reitera cu FASE ta drentando su etapa final, y tur hende mester bay traha bek aworaki.
El a elabora riba e proyecto Aruba kier traha, cu ta e canal via cual tur hende lo mester haya trabao.
“Nos sa cu tin trabao, pasobra nos ta tende hopi comerciante ta keha cu tin trabao y nan no ta haya trahado. Pero nos sa tambe cu no ta asina facil pa tur hende haya trabao. Nos ta scucha kico hendenan ta pasa aden ora nan ta aplica pa trabao y e no ta facil; y pesey, nos a bin cu e proyecto ‘Aruba kier traha’ pa asina, atravez di e proyecto aki yuda esnan cu ainda no a yega un trabao, pa nan por logra esaki. Nos ta yuda cu curso, her-om of bijscholing pa asina tur hende por haya trabao. Nos a pidi Ministernan Rocco Tjon y Minister Glenbert Croes, pa traha riba e proyecto aki y nan lo ta presentando esaki proximamente na comunidad. Mientras, nos a traha riba fortifica nos economia, bin cu mas desaroyo economico pa crea mas cupo di empleo.
Aworaki nos mester pa tur hende realiza cu FASE ta drentando su fase final. Fecha exacto nos tin cu caba di delibera cu Hulanda, pero e lo no dura mucho mas, y esey ta algo cu aworaki nos lo mester di apoyo y cooperacion di tur hende. Tur hende cu ta den FASE, tur comerciante cu ta den loonsubsidie, esaki ta e momento pa duna bek. Gobierno a yuda tur e lunanan aki, ma gobierno no por keda mantene artificialmente esnan cu pa un of otro motibo, a wordo afecta hopi mal door di covid-19. Nos tey pa yuda si, a traves di ‘Aruba kier traha’ pa asina tur hende por yega na un trabao”, Minister Presidente ta enfatiza.
