CEO di ATA, Ronella Croes:
ORANJESTAD (AAN)-- CEO di Aruba Tourism Authority, señora Ronella Croes, den entrevista cu Matutino DIARIO a expresa cu no por bisa cu e hecho cu por yama bonbini na mas bishitante, ta trece cu ne cu bo ta haya mas movecion riba nos Isla.
“E no ta kita cu informacion semper ta bon, y no ta kita cu enberdad nos ta keda den dialogo y forma parti di comisionnan cu tabata tin, cu tabata bin cu recomendacionnan concreto riba UTV’s y ATV’s y riba otro areanan. No ta cosnan nobo; nos tin mas cu dies aña cu nos a forma parti di plataformanan; mas cu diez aña cu puntonan specifico cu a trece dilanti cu kico nos ta haci. E puntonan ey ta keda valido. Personalmente, mester ehecuta e puntonan aki, basicamente nan no ta den e skina di ATA, pero cu nos ta keda para p’e”, Ronella Croes a señala.
El a agrega cu banda di esey tin un fluho di informacion cu, definitivamente, bo ta bay mira un ATA cu ta bay haci mas riba e area eynan. Entre otro, ATA ta lansando pronto, un set di publicacion local, no dirigi na e comunidad pero na e bishitante, segun Ronella Croes ta splica.
“Pues na e huesped cu nos ta yama bon bini na nos cas, y esaki ta parti di e maneho cu nos ta enfoca mas riba dje. Internacionalmente, nos a cambia nos strategia. Aña pasa nos a lanza e slogan ‘When you love Aruba, it loves you back’ y esaki ta un cambio basta grandi den posiciona Aruba internacionalmente, unda Aruba ta cuminza papia internacionalmente caba; prome cu considera Aruba, nos ta papiando cu bo di ‘responsable tourism’, kico Aruba ta para p’e. Un Aruba cu kier proteha locual cu nos ta aprecia y e papel di e bishitante den esaki, cu ora bo bin, nos kier pa bo yuda nos, proteha nos Isla cu ta duna abo tambe, como bishitante, asina hopi cos bon. Pues hunto nos tin cu haci esaki”, Ronella Croes a subraya.
El a reitera cu di e tipo di cosnan aki ATA ta papia internacionalmente di dje, y ta p’esey por mira presencia di ATA den diferente plataforma.
“Pero fuera di enfoca internacionalmente riba esaki, nos ta biniendo aworaki mas pa ora cu e bishitante a dicidi y el a yega na nos Isla, e ta bay mira hopi mas di e tipo di informacion aki tambe. ATA ta inverti hopi caba den borchinan y informacion aki aya, pero nos ta bay eleva nos esfuerzonan no solamente dirigi riba e huesped directamente, pero tambe riba operadornan”, CEO di ATA, Ronella Croes a remarca.
