Lider di PPA, Otmar Oduber:
- Cu 12 miyon florin por paga 240 agente policial pa subi caya
ORANJESTAD (AAN) Parlamentario Otmar Oduber, Lider di PPA, a remarca den conferencia di prensa, cu tin un diferencia entre loke Cuerpo Policial, y Alto Mando di Polis ta bisa, den sentido cu tin un 65% di “onderbezetting” den e aparato di polis, y e Minister cu ta bisa cu ta rond di 40%, cu, toch, ta hopi halto.
“Bo por ta 3% of 5% di falta di personal, pero ora bo ta 40% of 65% abao den e cantidad di personal cu bo mester pa cuida bo pueblo, bo por imagina kico esaki ta haci den KPA? Riba esnan cu tin cu traha overtime.
Segun Oduber, ta papiando di 12 pa 13 miyon Florin pa aña na overtime. Cu 12 miyon Florin na overtime, nos por pone 240 agente policial mes, pa aña, riba caya; salario di 240 agente policial. Anto nan tin un tekort na e momentonan aki di mas of menos 300 pa 340 personal riba caya, pa no papia di casi 60% di personal den oficina cu ta necesario den nos Cuerpo Policial, na e momentonan aki”, Oduber a señala.
El a agrega cu p’esey e ta bisa cu nan kier mira un Parlamento diferente. “Bo ta bay haya den fraccion di PPA un parlamentario cu tey djis pa stempel, cu si gobierno tey e tey p’apoya y defende tur loke ta sosode den gobierno, y si bo ta den oposicion, pesey e ta bay critica gobierno. Nos ta contento cu nos accionnan. For di cuminzamento caba nos a mustra, atravez di e mocion cu a wordo tuma unanimamente, cu nos ta bay atende cu ne”, Otmar Oduber a expresa.
Oduber a sigui bisa cu awo pueblo tin cu bay wak den e tratamento di presupuesto, e sinceridad cu tin den su politiconan y Parlamento tambe, pa coregi e problemanan serio cu nos tin, entre otro, den Cuerpo Policial.
“Pasobra, lamentablemente, nos a mira un amienda, a sabienda cu e fraccionnan di AVP y FUTURO a bay di acuerdo unanimamente cu e problemanan serio cu tin den nos Cuerpo Policial, nos no ta mira cu nada a bin dilanti di e mocion aki, cu nan mes a firma”, e Lider di PPA a señala.
