Aduana ta haya un edificio y Aruba un centro di vivienda ---- Placa ta wordo elimina ora bolbe na e sistema antiguo di negoshi --- ”Swap” y “Barterdeals” ta bira e formula den recuperacion mundial
ORANJESTAD(AAN)= Goberna un pais na momento cu ta habri cranchi y placa ta basha, ta sumamente facil.
Goberna un pais ora tin menos recurso pero un Pueblo ciego no ta mira cu ta gasta placa cu e Pais no tin, ta e practica cu a hinca Aruba den un desastre financiero total y a haci cu Hulanda na careda a bati na porta di Aruba y impone supervision financiero despues di e drama historico di “Fort Zoutman”.
Na e momento aki, gobernantenan rond mundo ta sinta cu e realidad cu a wordo crea dor di Covid-19, cu a basha economia mundial abou.
Simultaneamente por mira crisisnan importante saca nan cabez y manda prijsnan halto, loke tin impacto no solamente riba benta di productonan local, pero ta influencia proyectona grandi di Gobierno.
Den un resumen di e realidad financiero di Aruba for di inicio di Siglo 21, DIARIO lo mustra awe con un ciclo di problema financiero y economico serio a desaroya y a culmina na momento cu Covid-19 a haci su entrada y no solamente a habri porta pa problema financiero pero tambe pa necesidad di formulanan nobo pa recuperacion.
Mr. Evelyn Wever-Croes sigur no a nace cu un tarea facil den su man, ora destino a dicidi cu e ta bira Prome Ministro di Aruba na 2017 y bira e politico cu Arubianonan a mira como dirigente di nan pais na 2021.
Falta di bon planificacion di structura riba tur tereno, a laga Aruba atras na 2017 cu un necesidad enorme di reedifica e structura di e pais.
Ora papia di infrastructura di un pais, ta papia di loke un pais mester pa e funciona y cu ta e trabou directo di un Gobierno.
Infrastructura no ta nifica un proyecto aki y un proyecto aya y crea loke antes tabata conoci como “werkverschaffing” y ta duna politiconan na mando mas voto.
Infrastructura di un pais ta nifica cu ta percura pa e pais por funciona segun e base di mercado habri basa riba comercio liber.
Un parti importantisimo di comercio na Aruba, ta importacion di cual Aruba ta depende.
Importacion ta mara na Ley y mester sigura cu leynan ta wordo respeta pa asina hasta evita abuso contra comercio respetuoso di ley y di e pais.
Aruba tabata den necesidad di un bon edificio pa su Cuerpo di Aduana, cu ta e protector di leynan di importacion na Aruba.
Den e situacion cu Aruba ta actualmente, un edificio pa Aduana ta imposibel. Aruba no tin placa, punto!
Fin di siman pasa, ora Prome Ministro Wever-Croes a anuncia cu Aruba ta bay haya un edificio di Aduana super moderno, el a deshaci di e problema cu falta di placa a crea, y a aplica e formula cu awe ta base di un structura nobo di comercio pero tambe di gobiernonan rond mundo.
“Swap” tabata e sistema nobo cu ta wordo aplica y ta nifica cu e compania Bohama ta percura pa Aruba haya un centro di operacion moderno pa su Cuerpo di Aduana, a cambio di otro edificio ta haya di Aruba.
No tin transaccion di placa, pero di balor.
“Swap” na e momentonan aki ta e forma cu gobernacion y comercio mundial ta atende cu negoshi y ta directamente relata cu “barterdeal”.
E conceptonan ta nifica cu un persona of compania ta entrega e otro compania algo y ta ricibi algo otro cu mes balor a cambio.
E sistema aki ta haci mundo bolbe na origen di comercio, di intercambio di producto, pa cual awor placa ta wordo uza como medio.
Antes tambe e campesino tabata entrega producto di cunuco por ehempel y tabata ricibi mesa cu un carpinte a traha.
Awe placa ta cay afor como medio di pago, pues, pa un negoshi directo tuma lugar y un accion necesario tuma lugar ora Aduana haya su edificio y Bohama e edificio bieu cu e por reconstrui den un centro di vivienda.
Prome Ministro Wever-Croes a haci uzo di un formula, cu gobiernonan rond mundo y tambe comercio kier aplica, den cual placa no ta wordo uza como medio di pago pero ta intercambia posecion of produccion directamente!
Goberna ta vision y apertura di portanan nobo, manera atrobe e Prome Ministro di Aruba a demostra.
