Medidanan tuma ta dunando resultado
ORANJESTAD (AAN): Diamars mainta durante conferencia di prensa cu Gobierno a duna dilanti ImSan na San Nicolas, ora cu e Mobile Unit a cuminza duna vacuna na ciudadanonan di San Nicolas, a haya mas detaye di e situacion di Coronavirus e siman aki na Aruba.
Prome Ministro Evelyn Wever Croes a bisa cu Gobierno ta cautelosamente optimista pa mira con den un siman, e cifranan di casonan positivo di test di Covid-19 a cuminza baha, specificamente e ultimo tres dianan.
Si check bek, un siman pasa tabatin 3 dia tras di otro cu testnan ta divulga cu tin riba di 1.000 caso nobo cada dia na Aruba. Y aworaki ta mirando cu e promedio di casonan nobo ta banda di 500 persona contagia.
“Ohala cu e tendencia aki continua, y cu nos por sigui domina e cantidad halto aki,” Prome Ministro Evelyn Wever-Croes a indica.
Te cu Dialuna, Aruba tabatin 3.679 caso activo, cu ta un indicacion cu e cifranan ta bahando. E promedio di positivity-rate ta halto, esta na 63%, y esey ta motibo pa keda na e nivel di preocupacion y alerta cu nos ta. “Pero no ta alerta pa panico,” Wever-Croes a indica.
Mesun cos ta e situacion na Hospital. Wever-Croes a bisa cu te cu Dialuna, tabatin 31 persona hospitaliza cu Covid-19. Varios di e pashentnan aki a yega Hospital pa ‘algo diferente’ pero ora di haci test, a resulta cu nan tin Coronavirus. Den Intensive Care tin awor 5 persona cu Covid-19, y esey toch ta un cifra cu Aruba ainda tin’e domina.
“Pues nos ta preocupa, pero e no ta motibo pa nos ta den panico. Nos no a sali di e candela/problema ainda, y nos mester sigui cuida,” Wever-Croes a reitera. Loke esaki ta demostrando ta cu e medidanan cu Gobierno a tuma ta dunando resultado.
“Si bo compara Aruba cu otro paisnan den region, bo ta mira cu e cifranan ta bahando, danki na e decisionnan importante y rapido cu a wordo tuma,” Prome Ministro Evelyn Wever-Croes a mustra.
