Merca y Control Aereo di islanan ABC a haci palabracion nobo pa mantene espacio aereo mas safe
ORANJESTAD (AAN): Prome Ministro Mike Eman hunto cu Directora di Departamento di Relaciones Exteriores di Aruba, Jocelyne M.M. Croes, a tene un conferencia telefonico cu Consul General Ramon Negron riba Bispo di Pasco, y nan a wordo informa di lo siguiente.
Forza Aereo Mericano Southern y e servicio di control aereo di region Caribe Hulandes (DC-ANSP) a bay di acuerdo riba un plan nobo pa haci bulamento mas safe y eficiente den espacio aereo rond di islanan ABC aki.
E plan ta enfoca riba mihor maneho di alturanan di vuelo, espacio aereo, y horario. Door di haci esey, tanto avionnan civil y militar por move door di espacio aereo di parti zuid di Caribe cu menos retraso, y mas pre-visibilidad. Ta importante pa menciona cu e acuerdo ta bay mantene cierto coredor aereo liber di actividadnan militar Mericano, cu ta garantiza e fluidez di e vuelonan di e aerolineanan local, y avionnan priva.
E acuerdo ta enfatiza e cooperacion fuerte entre Merca y autoridadnan di aviacion. Via di mihor planeamento y coordinacion di tempo real, vuelonan pa y for di e islanan Aruba, Bonaire, y Curaçao lo bay ta mas safe y mas rapido, mientras ta keda mantene e separacion necesario for di demas training y misionnan di militarnan Mericano.
