Aclariando dudanan cu cierto lider sindical a expresa,
ORANJESTAD (AAN): Durante e dianan aki, por a tuma nota di expresionnan di cierto lider sindical cu ta expresa duda den locual cu Gobierno ta trece dilanti te hasta bisando cu Prome Minister di Aruba ta gaña pueblo. Prome Minister Evelyn Wever-Croes, durante Conferencia di prensa di Gobierno di Aruba, a aclaria e expresionnan haci door di sindicato y un biaha mas a splica tocante e trayecto pa logra kita e recorte salarial.
Premier di Aruba a enfatisa cu e trayecto cu ta encaminando ta basa riba hecho y ta netamente locual cu Gobierno ta papiando di dje ya pa 8 luna largo caba, den tur transparencia y claridad como tambe na un manera comprendibel pa tur, incluyendo sindicatonan. Den tur comunicacion, radio, television, corant y medionan social, Gobierno a percura pa informa tocante e trayecto pa logra kita recorte. Mas ainda, Prome Minister y Secretario di Estado di Reino ta papia riba mesun nivel y mesun cos ora ta trata di e topico aki.
Prome Minister a duna di conoce cu ya desde october aña pasa Gobierno a haci peticion na Hulanda pa e aña aki, 2022, presupuesta y paga e placa cu a wordo corta den e di dos mita di aña. Na januari Gobierno a sinta cu sindicatonan, sinembargo nan no tabata contento pasobra nan tabata kier ful e 12.6% mesora. Gobierno na e momento ey a splica e sindicatonan, detayadamente, den tur transparencia y claridad, cu esaki no tabata posibel financieramente pa Pais Aruba carga esaki.
Na februari, despues cu a haya contesta di Hulanda cu no mag stop e recorte, toch Aruba a sigui insisti. Consecuentemente na mei a delibera cu Secretario di Estado di Reino, señora Alexandra van Huffelen riba esaki, y riba dia 20 di mei, van Huffelen a informa cu a logra convence su Conseho di Minister na Hulanda, pa permiti Aruba cuminsa cana e caminda, contal Aruba cumpli cu algun condicion. E informacion aki a keda publica den un relato di prensa door di Secretario di Estado, cu e plan pa bay Conseho di Reino dia 24 di juni pa nan aproba esaki. Y esaki a pasa tambe diabiern 24 di juni.
Lamentablemente, Prome Minister a expresa, Corsou y Sint Maarten a pidi pa pospone e Conseho di Reino aki y ta sigui na mesa cu Hulanda. Den fin di siman, na momento cu Secretario di Estado tabata na Aruba pa reunionnan riba nivel di Gobierno cu Aruba, Corsou, Sint Maarten y Hulanda, Aruba a yega na acuerdo cu Hulanda na condicionnan cu a wordo aproba den Conseho Minister di Reino.
Concluyendo, Prome Minister a enfatisa cu Aruba na e momentonan aki ta un paso mas cerca den direccion di pone e recorte salarial den pasado, cuminsando cu e pago na juli. Aworaki cu positivismo y optimismo lo wak pa cumpli cu e condicionnan y sigui padilanti.
