ORANJESTAD (AAN) – Minister Presidente Evelyn Wever-Croes, a declara den conferencia di prensa di gobierno, Dialuna,
cu aunke no ta su custumber e kier a reacciona riba algun “voice message”, y mensahenan den facebook, cu tabata circula den fin di siman, pa crea panico cu gobierno ta bay kibra tur contrato di lease existente, pa manda tur na un solo compania.
Prome Minister a bisa cu, absolutamente, esaki NO ta berdad! Ni cu tur ta bay pa un solo compania, unda cu pa casualidad su casa a cuminza traha algun dia pasa. “Esaki tampoco ta berdad”, e dignatario a acentua.
El a indica cu e mensahe ta sigui bisa cu ta bay informa Hulanda. “Laga mi bay den esencia. Gobierno no por kibra un contrato di lease asina sin mas. Y mi por papia pa experiencia. Ora mi a bira Minister Presidente, mi a yega y a tuma e ministerio di Mike Eman. Mi a haya cuater auto gelease pa e ministerio aki. Mi a bisa cu mi no mester di cuater auto; un of dos maximo nos mester. Un pa mi cumpli cu e ceremonianan protocolar of caminda mi mester ta na un forma representativo, y e otro ta pa e persona cu mester hiba nos post tur caminda cu mester wordo hiba”, e dignatario a relata y a splica cu e kier a kita dos auto, pero e no por a kibra e contrato.
E ora ey el a pasa e contratonan pa otro departamento cu tabata tin mester di nan cu urgencia, y asina e compania a cambia e autonan. Kiermen, no por kibra e leasenan asina sin mas.
E dignatario a splica cu ora cu ta trata di leasenan cu ta vence, of autonan nobo cu mester wordo gelease, tin un procedure cu ta wordo aplica aworaki y e lo sigui wordo aplica. E mandatario tambe a refuta locual ta para den e mensahe, cu autonan di KPA, Warda Nos Costa, entre otro ta bay na un solo compania, pasobra esaki NO ta berdad.
E mandatario a splica cu ora un departamento tin mester di un auto, tin regla. Na prome lugar cu e mester keda dentro di e presupuesto cu a wordo aproba e aña concerni. Ta busca dos of tres oferta y ta scoge esun di mas barata y varios instancia ta controla e procedure aki, manera Directie Financien, Aruba Reken Kamer, CFT y hasta Parlamento cu ultimamente a pidi tur e listanan di autonan. Asina Minister Presidente a splica.
El a subraya cu esakinan ta noticia falso, solamente dirigi na bruhamento di tera, trece discordia y crea rabia y cu ta sosode ora oponentenan no tin argumento pa hiba un debate riba dje. E mandatario a señala cu tur e mensahenan aki tabata entorno di su casa, cu mas di un aña y mey pasa a haya un trabao den sector priva. Si ta den gobierno e lo a haya trabao nan lo a critica y awor ta den sector priva tambe tin critica, y e dignatario ta puntra su mes “Ta kico anto?” Pasobra “acaso e casa di un politico no tin derecho di traha pa mantene su famia?” E mandatario a remarca cu esaki no ta yuda nos pais bay padilanti.
