ORANJESTAD (AAN): Dialuna 4 di juli a cuminsa den Parlamento e tratamento di e Ley di FASE.
Esaki ta e ley cu ta duna e base legal na e pagonan di FASE cu a worde haci durante di e pandemia. Hopi famia na Aruba a worde yuda cu FASE. E ley aki a tarda pa cana su caminda pa e motibo aki ta apenas dialuna Parlamento ta trat’e. “Mi a desea cu esaki no a tarda asina tanto pero mi ta hopi contento cu Gobierno di Aruba a introduci FASE y por a yuda miles di persona aki na Aruba, Prome Mininster Evelyn Wever-Croes a expresa.
Prome Minister a duna di conoce cu no por a warda pa e ley prome pa haci e pagonan pa motibo di e urgencia cu tabata tin. Por corda cu diabierna 13 di maart 2020, Aruba a conoce su prome 2 casonan di Covid 19. Ya e siguiente Dialuna, scolnan a worde cera, sigui pa ciere di frontera, a introduci Shelter-in-Place y Toque de Queda.
E ansha a cuminsa lanta na Aruba. Miles di persona ya caba a cuminsa perde trabao pa motibo cu negoshinan a cera nan porta cu a haci cu no por a sigui paga salario. Na e momento ey no tabata tin loonsubsidie. Promesa di Hulanda tabata pa yuda cu loonsubsidie, miestras Aruba ta cumpli cu un cantidad di condicionnan. Aruba a haya e prome placanan pa loonsubsidie na mei.
“Danki na accionnan rapido di Minister Glenbert Croes, hunto cu Minister Xiomara Maduro, Gobierno a logra bin cu e proyecto di FASE cu a yuda miles di mama y tata di famia cu a perde nan trabao. Taxistanan y esnan cu tabata tin negoshi chikito tambe a worde yuda cu FASE. E FASE tabata un suma di 950 Florin pa luna cu sigur a worde bon uza pa esnan cu a bin na remarc’e pa esaki”, Prome Minister a duna di conoce.
E Ley di FASE ta worde trata awo na Parlamento. E ley sigur lo mester a pasa mas lihe. Pero pa Gabinete Wever-Croes II, den e pandemia e tempo ey, prioridad tabata pa salba bida di hende. Salba trabao di ciudadanonan. Percura pa esnan cu a perde trabao haya ayudo financiero y pakete di cuminda pa nan por sobrevivi. Despues cu e parti mas critico a pasa, Gobierno a concentra riba e ley cu ta den Parlamento aworaki. Minister Glenbert Croes y Minister Rocco Tjon ta den Parlamento pa defende e ley aki.
“Mi ta lamenta cu oponentenan a laga sa cu nan no tin confianza mas den Minister Glenbert Croes pa motibo cu a tarda asina tanto cu e ley aki mientras cu si tin algo nos mester bisa di Minister Croes, ta pa duna elogio. Pasobra mientras cu tur hende, inclusivo e parlamentarionan aki, tabata den shelter in place hopi safe cu nan famia, Gobierno a sigui traha. Minister Glenbert Croes a sigui traha y, apesar di tur cos, ya dia 16 di maart pa 20 di maart a prepara henter e Proyecto di FASE y Conseho di Ministronan completo riba 20 di maart mes a aproba e FASE y miles di ciudadano a worde yuda.
Prome Ministro ta lamenta cu algun usuario di FASE a malusa esaki. Awo mester atende cu nan pasobra esaki sigur no tabata e intencion.
