Riba Dia di Mundial di Medio Ambiente:
ORANJESTAD (AAN): Durante e di 38 sesion di e International Coordinating Council (ICC) di UNESCO su programa Man and the Biosphere (MAB), cu a tuma luga na Paraguay, Aruba oficialmente a wordo admiti den e prestigioso network global di e programa Man and Biosphere di UNESCO. Prome Minister Mike Eman a graba un mensahe special cu a presenta na e sesion internacional.
Den su mensahe, Prome Minister Eman a expresa su agradecimento na Gobierno y pueblo di Paraguay den organisacion di e importante encuentro. El a destaca cu, a pesar di distancia geografico entre Paraguay y Aruba, tur dos pais tin un laso comun den nan compromiso pa proteha e rikesa natural cu nan a hereda. Eman a remarca cu e admision di Aruba den e Network Mundial di Reserva di Biosfera ta mucho mas cu un reconocemento internacional. Segun Eman e ta un momento historico cu confirma e vision comparti di Aruba pa un futuro unda desarayo economico, bienestar social, patrimonio cultural y proteccion di naturalesa ta bay man den man.
“Nos no ta mira sostenibilidad como un escogencia entre progreso y naturalesa. Nos ta mira sostenibilidad como e caminda pa logra progreso cu ta duradero,” Eman a expresa. Den su intervencion, e Prome Minister a enfatisa cu bienestar di pueblo di Aruba ta directamente relaciona cu e salud di su ecosistemanan. Como isla, Aruba ta comprende cu laman, tera y cielo no ta simplemente recurso natural, sino un parti inseparabel di su identidad, historia y futuro. E Reserva di Biosfera di Aruba ta incorpora tanto su area riba tera como den lama, reflehando e conviccion cu un futuro resiliente y prospero ta depende di nos ecosistemanan saludabel y bon maneha. Prome Minister Eman a gradici tur e organisacionnan, institucionnan y personanan cu a contribui pa logra e meta aki, incluyendo UNESCO Aruba, UNESCO Office for the Caribbean na Kingston, Aruba Conservation Foundation, diferente instancia gubernamental, partnernan den ciencia y investigacion, organisacionnan di sociedad civil y representante di sector priva.
Segun Eman, e reconocimento aki no ta marca e fin di un trayecto, sino e cuminsamento di un capitulo nobo pa Aruba. Un capitulo enfoca riba fortalecemento di conservacion, promocion di investigacion cientifico, participacion di comunidad y educacion di futuro generacionnan pa sigui cuida e patrimonio natural di nos isla. E Prome Minister tambe a destaca e programa nacional di reforestacion, Sembra Speransa. Segun Eman, cada mata planta ta representa un inversion den futuro y un simbolo di esperansa p’e generacionnan cu lo bin despues di nos.
Ademas, Eman a subraya importancia di ciencia, innovacion y cooperacion internacional pa enfrenta e retonan ambiental di futuro. Den e cuadro aki, Aruba ta sigui fortalece su cooperacion cu institucionnan academico y cientifico internacional, incluyendo Wageningen University & Research, cu e obhetivo di impulsa conservacion di biodiversidad, resiliencia climatico y innovacion sostenibel den region Caribe.
Cu su admision den e network mundial di Reserva di Biosfera, Aruba ta uni cu un red internacional di e paisnan y regionnan cu ta comparti e mesun compromiso pa logra un balansa duradero entre ser humano y naturalesa.
“Nos isla, chikito den tamaño pero grandi den spirito, nos reafirma nos compromiso cu un futuro unda pueblo, naturalesa y prosperidad ta avansa hunto,” Eman a conclui.
