ORANJESTAD (AAN): Diahuebs mainta Prome Minister Evelyn Wever-Croes a reuni cu Nigel Maduro y Oriana Wouters cu
ta representando diferente organizacion na e conferencia COP29 y ANTICOP cu ta tumando luga den exterior, riba cambio climatico.
E conferencia COP29 ta un conferencia cu hopi pais na mundo ta participa y ta tumando luga na Azerbayjan. Nigel Maduro como hoben Arubiano a worde eligi pa representa un organizacion internacional, como representante di e hobennan na e conferencia aki. Pa e por a logra bin na remarke pa representa dicho organizacion, e mester a pasa un “screening” basta pisa, di cual el a logra pasa exitosamente.
Prome Minister a expresa cu ta di suma importancia, pa ora un persona bay atende conferencianan asina, pa e ta altanto di kico e pais ta haciendo. Pa cu esaki, Prome Minister a reuni cu Nigel pa asina inform’e di tur e esfuersonan cu Gobierno ta haciendo riba diferente tereno. Durante e reunion a toca e topico di transicion di energia, di cambio climatico, di representacion di hobennan y varios otro tema.
Señor Maduro tambe lo ta presente na e conferencia ANTICOP cu lo tuma luga na Mexico, na unda nan ta trata e mesun topiconan pero den un otro perspectiva. Prome Minister a expresa di a palabra pa sigui intercambia ideanan, y pa por reuni cu Señor Nigel y Señora Oriana na momento cu nan yega back Aruba pa asina comparti kico ta e “best practices” nan pa por implementa na Aruba tambe.
“Mi ta haya participacion di hobennan na conferencianan internacional hopi importante, y ta contento di mira con nan ta tuma un rol activo riba e tema aki. Mi ta desea señora Oriana y señor Nigel hopi exito” Prome Minister a expresa.
