ORANJESTAD (AAN) – Prome Minister mr. Evelyn Wever-Croes a yama un conferencia di prensa den cual e kier a duna un “state of affairs”.
E dignatario a duna su informacion combina su slides.
“Nos ta cerando un gobernacion di Gabinete Wever-Croes 2, despues di 7 aña y mey, gabinete 1 y 2. Y nos ta mira un desaroyo economico impresionante di nos pais, cu ta nos DGP, nos economia.
“Por mira tambe na 2020 kico e pandemia a haci cu nos economia ora bo ta wak cu como 25% total di nos economia a wordo ‘wipeout’ door di e pandemia. Pero bo ta mira tambe cu gobierno a recupera bastante fuertemente, despues di esey. Awe nos tin GDP hopi mas halto cu nos tabata tin prome cu e pandemia. Y, bo ta weita tambe cu nos tin crecemento economico stabil cada aña. Claro, e no ta den dobel digit mas, aworaki ta den single digit pa no overheat bo economia”, Prome Minister a señala.
E mandatario tambe a mustra e desaroyo di inflacion, cu tambe ta un reto grandisimo, un reto mundial, tur pais na mundo a haya nan mes enfrenta cu esaki. “Y aki na Aruba tambe despues di pandemia bo ta wak cu inflacion a subi no solamente door di e pandemia, pero ora nos a sali di dje a bin e guera di Ukraine cu tambe a contribui na mas inflacion. Awo, danki Dios bo ta mira con inflacion ta bahando y ta yegando na un nivel cu el a, manera, estabiliza relativamente abao”, Minister Presidente a señala.
El a indica cu inflacion na Aruba, aun halto, toch ta mas abao cu e region, cu Merca y cu Hulanda.
E mandatario tambe a mustra con e deficit financiero di Aruba a desaroya den un surplus financiero.
“Bo ta mira dos color cada aña. Bo ta wak di 2017 te 2024, e color manera blow ta e saldo financiero, esey ta e surplus of e deficit, manera nos conoce den ley. Geel ta e prome saldo, cu ta e saldo si bo saca interes afo. Esnan di Finanzas y Economia ta gusta uza e prome saldo pero pa nos, pa ley, nos tin cu wak esun blow. Y bo ta wak atrobe, kico a pasa na 2020. 2021 tabata deficit hopi grandi, y toch despues di pandemia nos a logra un surplus chikito, pero nos a logra un surplus”, Minister Presidente Evelyn Wever-Croes a subraya.
