Den pasado caba tabata wordo bisa di e negoshi cu casnan - *Ta bay dicidi kico lo sosode cu e casnan
ORANJESTAD (AAN): Tin varios desaroyo cu ta tumando lugar banda di Colony. Prome Minister Evelyn Wever a duna di conoce cu relaciona cu e casnan na Colony tin un investigacion andando pasobra den pasado tabata tin hende cu a haya cas, no ta paga huur. Otronan cu tabata conoce hende cu tabata traha den DIP a haya cas eynan.
El a bisa cu den pasado ora cu durante e gobierno di Nel Oduber y cu Marisol Lopez Tromp tabata Minister di Infrastructura ya caba tabata wordo bisa di negoshi cu casnan na Colony.
Segun e mandatario, e investigacion aki ta finalisando aworaki pa bay tuma decisionnan riba kico ta bay pasa cu e casnan. Tin algun cas cu ta den bon condicion, cu hendenan cu ta huur'e ta mantene hopi bon y nan ta bay haya un opcion pa cumpra e cas.
Tin otro casnan cu ta den hopi mal condicion y cu hende cu ta biba aden no ta paga huur y relaciona cu esaki tin cu tuma un decision di kita e casnan for di nan y bash'e abao y otorga e tereno na otro hende, a remarca.
Tin otro terenonan bashi cu edificionan decai y cu ningun hende ta biba aden cu mester basha abao y otorga e tereno den erfpacht na otro hende, e mandatario a splica.
E desaroyo ey lo bay crea un crecimento rond di e area di Colony caminda cu ta bay atrae mas desaroyo. Tur esaki ta den preparacion, pero ora cu ta asina leu e departamentonan mes lo haci un presentacion, Premier Wever-Croes a indica.
E caminda y e lusnan, tur esey ta inclui den e plan. Ta purbando pa locual ta basico y cu ta mas urgente manera e tema di sushi, desperdicio, barinan, etc, tur esaki ta cosnan cu no por warda te ora e desaroyo keda cla.
Ta percura pa atende cu lo basico manera e careteranan, e iluminacion, cual ta los di e proyecto grandi ya cu nan ta urgente, a remarca.
