Naci den situacionnan mundial impactante y di cambionan grandi - *Nan a nace den e shock petrolero pa bay topa cu e recesion grandi - *Hende ta esencia di planificacion di futuro di pais y di mundo
ORANJESTAD (AAN) — Pa por informa Aruba debidamente, continuamente mester analisa sucesonan y pronosticonan di expertonan riba e forma cu futuro por wordo afecta y e margen di incertidumbre cu semper ta keda, manera Covid-19 a demostra.
E pandemia a cambia rumbonan cu mundo a planifica pa economia y situacionnan financiero cu tin resultado pa e situacion mundial social.
Prioridadnan nobo a mira luz y factornan nobo ta wordo tuma na consideracion y un realidad ta expresa su mes cada rato cu mas claridad.
Durante Siglo 20, un generacion a domina pa e poder cu e siglo a entrega na e grupo cu a bira conoci como Baby Boomers, naci den e rikesanan mundial di Epoca di Oro y di tecnologia, den cual tur cas a conoce un auto, television, comodidadnan nobo y hende a subi jet y raket.
E Epoca di Oro a trece hopi problema tambe pa un mundo, cu a cuminsa basha abou, na momento cu e Generation X a nace entre 1965 y 1980, pa rementa den e epoca cu e prome Millennials a nace entre 1981 pa 1996.
Awe Aruba y mundo mester crea un futuro nobo na e momento cu e traspaso financiero y economico mas grandi cu mundo moderno mester a conoce, cu tabata e traspaso di poder na Millennials, ta tuma lugar.
Covid-19 a entrega exigencianan nobo na momento cu Covid-19 a exigi reconstruccion di mundo pero tambe a pone berdadnan ignora riba mesa.
Mundo tabata spera un crecemento economico den futuro cercano. E velocidad di progreso tabata kita realidad di e ser humano cu mester tuma mando y maneho di mundo y di paisnan for di bista.
E prome grupo di Millennials na 2021, lo cumpli cuarenta aña di edad. Kico futuro ta contene pa nan?
Si mira loke bida a ofrece nan te awor, ta mira manera ya nos a trece dilanti, cu nan a nace den e epoca despues di 1979, ora crisis di petroleo a hinca mundo den un realidad nobo y a causa e shock petrolero cu a afecta paisnan productor di petroleo y a afecta Aruba tambe. Lago a cera.
Mundo mester a busca un rumbo nobo den e ultimo decadanan di Siglo 20 durante cual e Millennials a nace.
Progreso tecnologico y sigur e lugar cu entre otro turismo a bay ocupa, a crea posibilidadnan nobo den situacionnan internacional, cu na 2007 pa 2009, a conoce e Great Recession cu a exigi paisnan busca forma pa aumenta nan entrada.
Restructuracion di belasting den e tempo aki a bira un herment conoci y Aruba por ehempel a conoce introduccion di BBO pa confronta Great Recession mundial.
E situacion petrolero mundial y inversionnan nobo cu refinerianan tabata exigi a bira na Aruba salida di Valero cu a wordo mal maneha dor di Gobierno Mike Eman, cu deshaci di mitar di entrada na BBO pa e pais, introduccion di e pakete di e proyectonan di Bo Aruba cu e fondo di 1.6 Biyon y creacion di un debe nacional cu a exigi Hulanda actua.
Den e situacion aki, e futuro di Millennials cu mester a haya tur atencion a bay perdi pa Aruba y mundo bay topa cu e Pandemia di Covid-19.
Kico ta futuro di Millennials? Kico ta futuro di e hendenan cu mester carga Aruba pa un destino nobo den nan posicion actual of futuro mas cercano?
E prome grupo di Millennials a yega loke ta yama “Midlife”, mitar di bida.
Nan a alcansa 40 aña, aunke comunidad hopi bez ta mara e grupo aki na un edad mucho mas hoben.
Awe na un forma special mester di atencion pa e grupo aki cu mester haya un formula husto pa e segundo mitar di nan bida.
Con den futuro pensioen di behez, AZV, vivienda publico y tur loke comunidad ta ofrece, lo ta pa e grupo aki?
Hende ta e esencia di tur planificacion local y internacional. Den reconstruccion di futuro, Millennials mester bira mas cu un nomber pa un grupo.
E mester bira e grupo di ciudadano, cu a bira victima di e realidad cu el a nace na momento cu e Era di Oro, e Golden Age, mundial a pasa pa pasado!
