ORANJESTAD(AAN): Diahuebs durante un conferencia di prensa, minister di Asuntonan Economico, Comunicacion y Desaroyo Sostenibel Geoffrey Wever a duna un update riba e proyectonan cu tin den Oranjestad.
E mandatario a cuminza papia di e ‘concurso di nombra e plaza’, esaki ta relaciona cu e proyecto di un plaza den Wilhelminastraat y Columbusstraat cu ta caso cla.
“E idea ta pa e plaza bira uno culinario, caminda cu tin terazanan y ambiente”.
Nos ta desea pa e plaza aki haya un nomber cu ta pas cu e area aki y pa e motibo ey nos a bin cu un concurso pa nombra e plaza. Nos kier pidi tur esnan cu ta interesa pa participa den esaki, pa registra online via mi Facebook of via formularionan cu tin na Bestuurskantoor, segun Wever. El a sigui bisa cu e idea ta pa bin cu un nomber cu tin afinidad cu centro di Oranjestad, cu e parti cultural y e parti comercial y tin un relevancia pa Oranjestad.
“Si ta nomber di un persona, mester ta un persona no controversial y e no por ta nomber di un topico controversial tampoco, segun e minister, kende a indica cu despues lo selecta e 10 mihor nombernan y na final un comision special lo scoge e nomber ganador.
Wever a duna di conoce cu tur cos ta bayendo den bon direccion pa loke ta e trabaonan riba e plaza, unda cu ya caba ta poniendo e ultimo matanan.
El a splica cu e idea ta pa e ta un area cu entretenimento, unda cu e restaurantnan por pone nan terazanan tambe pafo, pa asina tin un ambiente nobo den full Oranjestad.
Segun e mandatario e prome fase di e proyecto aki lo wordo entrega den di dos siman di e luna aki, mientras cu pa e di dos fase Diaranzon a sali e publicacion pa e destaho publico. “E fondonan tey caba den e presupuesto y tur cos ta cla pa pronto e di dos fase por inicia pronto”, segun Wever.
