Mark Solognier, Hefe di Kustwacht:
ORANJESTAD (AAN)—Siguiendo cu DIARIO su entrevista cu señor Mark Solognier, Hefe di Kustwacht, otro punto cu a bin dilanti ta e situacion cu tin biaha ta presenta riba lama, y sigur den temporada di horcan, manera awo, cu por afecta botonan chikito, manera mal tempo repentino cu yobida y lamper.
Solognier a indica cu, mescos cu Meteo a señala, Kustwacht ta constata cambio den clima unda un rato lama ta bon y despues lama ta cambia. Esaki ta algo cu ta sosode frecuentemente. Kustwacht den pasado tabata duna conseho na e piscadornan relaciona cu e situacion aki di cambio di tempo mientras nan ta den lama, pero tin tempo sin hacie. E lo bolbe pone esaki riba agenda.
Solognier a menciona tambe cu nan tin schedule regular planea pa nan patruyanan y banda di esaki tin diferente accion tumando lugar, pa locual ta e parti preventivo, pa bisa e usuario di lama pa tene cuenta cu cierto aspectonan, entre otro, pa prome cu subi lama wak kico ta e pronostico di tempo, maske con bunita e panorama por ta mustra mas trempan.
Mark Solognier a reitera cu semper nan ta aconseha esun cu ta bay subi lama pa prome informa su famia na unda e ta bay, ki ora nan ta bin bek, cu si ripara cu e no ta bin e ora ey, bati alarma mesora, y asina Kustwacht ta prepara su mes y set in di biaha.
Pa Search & Rescue, ora un hende ta perdi riba lama, esaki ta hopi importante y eynan tempo ta conta. Solognier a bisa cu number di Kustwacht ta 913 pa tur loke tin di haber cu area maritimo; e ta gratuito y accesible 24/7.
