Sharline Koolman di DVG - *P1 ta mustra cu e ta baha e inmunidad riba e vacuna -
ORANJESTAD (AAN): Den e ultimo simannan, door di e proceso di vacunacion contra Covid-19 unda un porcentahe basta grandi di e poblacion a vacuna, a keda di analisa si tin posibilidad di elimina e PCR Test pa turistanan cu a vacuna y cu kier bishita Aruba.
Ta conoci caba cu for di 1 di Juni, e residentenan cu ta vacuna y ta bin bek Aruba despues di un viahe, no mester haci e test mas na yegada. Awor e pregunta cu ta surgi ta si e turistanan vacuna tambe lo mester sigui haci e PCR Test.
Relaciona cu esaki, DIARIO a puntra Sharline Koolman di Departamento di Salud con a para cu e posibilidad aki y el a splica cu Crisis Team ta den deliberacion 3 siman caba riba e topico aki.
A pidi conseho tambe di RIVM di Hulanda, entre otro, pa wak con por atende cu esaki.
Koolman a laga sa cu mirando e variantenan nobo cu tin manera esun di Brazil cual mundo tin hopi bista riba dje ya cu e ta afectando hopi algun pais, entre nan Reino Uni y Trinidad, y pa e motibo aki a decreta lockdown/shutdown.
Mayoria di e cierenan aki ta pa motibo di e variante aki di Brazil. Merca tin algun caso pero no asina hopi. Colombia tin hopi caso di e tipo ey, e representante di DVG a indica.
"Mirando e variantenan ey, no necesariamente e situacion di vacuna so of nos situacion local, bo tin cu wak di unda e turista ta bin, di cual pais. Bo ta wak e incidencia di e pais, con grandi e casonan cu e tin ta. Pero banda di esey bo tin cu wak ki tipo di variante tin eynan cu ta circula mas tanto", a remarca.
Basa riba e aspectonan anterior tin cu wak cual turistanan ta haya na Aruba of unda e residentenan ta viaha. Teniendo na cuenta esey ta wak ki ora ta safe pa kita e PCR Test y tuma vacuna so, Sharline Koolman a enfatisa.
Pesey tambe a introduci e eliminacion di e PCR Test pa e residentenan so cu a vacuna y cu ta viaha y ta bin bek. Esaki tambe ta pa wak kico ta sosode. Aworaki ta haciendo tambe entre Aruba, Bonaire y Corsow unda e incidencia ta hopi abao.
Basa riba e datonan ey ta bay wak si por flexibilisa mas cos si of no y mirando ki variante tin di e pais for di e unda e bishitantenan ta bin.
Koolman a remarca cu no ta simplemente cu ta bay kita e PCR Test pasobra a vacuna. El a bisa cu e mundo medico ta hopi mas complica cu djis kit'e door di e cantidad di hende vacuna.
E variante di Brazil conoci como P1 ta mustra cu e ta baha e inmunidad riba e vacuna. Tur e aspectonan aki tin cu vigila prome cu dicidi cu ta bay kita e PCR Test pa turista, a splica.
