Van Huffelen mester demostra cu e ta comprende e dolor di Aruba --- *Combersacion Wever-Croes y Van Huffelen den un panorama nobo --- *Exigencia monetario di Status Aparte awor ta asunto serio den Reino
ORANJESTAD (AAN) — Na momento cu e invasion di Ukraine dor di Rusia a basha economia mundial abou, manera DIARIO a pronostica, el a mishi tambe cu e sistema financiero mundial, cu ta den problema serio.
Tur pais na e momentonan aki ta lucha pa bienestar di nan moneda, cu ta basa riba nan situacion financiero, nan balor monetario manera a keda demostra na Europa.
Euro cu tabata wordo considera un moneda fuerte, a cay for di trapi den ultimo simannan.
E Florin Arubano, mara na Dollar Mericano, a haci cu Aruba no a mira su moneda cay hunto cu Euro cu tin Hulanda den un problema economico y social grandi y sigur ta haci cu Hulanda mas cu nunca lo tin mucho mas reserva cu asistencia financiero.
Na Aruba, Guera di Ukraine ta presenta su mes cu un inflacion enorme y den e forma cu e balor di Euro ta afecta instancianan y ciudadanonan cu ta depende di entrada Hulandes, manera pensionadonan cu un tempo a biba na Hulanda y ta depende di nan pensioen di Hulanda pero tambe companianan y entidadnan cu ta depende di entrada na Euro, cu ta sostene basta inversion na Aruba.
E guera na Ukraina a pusha prijsnan na Aruba den un lift y awe e Arubiano mester di un suma di placa mucho mas halto pa e cumpra e productonan cu for di tempo di Covid a subi, a cuminsa baha pero awor a bira raket.
Na 2020, Gobierno di Aruba a firma un acuerdo cu Raymond Knops pues prome cu 2022, cu a bira un desastre mundial inespera.
Gobierno awor mester cuida e Florin y mester percura pa gastonan no necesario baha pa asina por mantene gastonan cu no por baha.
DIARIO a studia cifranan di Gobierno Wever-Croes cu a baha gastonan cu por a baha. Cu mester sigui cu e ehercisio aki, ta un conditio sine qua non.
Nos ta insisti cu Hulanda mester acepta su responsabilidad pasobra na 2010 Hulanda a permiti pa e moneda wordo pone na peliger cu e debe nacional cu ta e pio enemigo di stabilidad di un moneda.
Debe nacional ta destructor di e moneda di un pais, manera a keda demostra na Venezuela durante e regimen di Nicolas Maduro durante e epoca cu Florin Arubano tambe a wordo pone na peliger serio dor di creacion di debe.
Pero husto no por paga pa pecador.
Nos mester insisti cu sosten di expertonan pa e reunion entre Prome Ministro Ministro di Aruba Evelyn Wever-Croes y e Secretario di Estado Hulandes pa Relacionnan den Reino, Alexandra van Huffelen, ta inicio di combersacion den cual e realidad nobo di Reino na 2022 ta wordo discuti.
Segun publicacionnan den Reino, Alexandra van Huffelen como Secretario di Estado di Hulanda encarga cu relacionnan den Reino, a realisa su mes cu tin problema social grandi na e islanan Hulandes den Caribe.
Awor e mester duna prueba cu el a comprende kico ta pasa den casnan di famia, caminda hopi realidad a cambia e cantidad di cuminda riba mesa.
Den hopi famia e trabou di e mama cu ta emplea na Gobierno cu tin e arma pa cobra belasting cu empresa priva no tin pa cobra su debedornan (incluso Gobierno), ta mas importante cu entrada di e tata cu por ehempel tabata traha pa su mes cu un ofishi of por ehempel den transportacion.
Falta di e 5 porciento ta haci cu e famia ta gasta 5 porciento menos (por lo menos) loke ta haci cu comercio ta ricibi cinco porciento menos, loke ta pone mas trabou na peliger.
Kico por cumpra cu Un Florin? Uno di e preguntanan cu a resona ora e Delegacion Arubano, dirigi pa Betico Croes, tabata negocia Status Aparte, di cual nos por duna testimonio como prome matutino di Aruba.
Segun e plannan di Status Aparte, un Florin Arubano fuerte mester tabata e base pa Aruba den situacionnan mundial cu awor ta presenta.
Cinco porciento ta topico di e reunion entre Prome Ministro Evelyn Wever-Croes y representante di Hulanda Alexandra van Huffelen, cu a splica su biahenan pa Aruba como necesidad pa comprende Aruba.
E siman aki e prueba di su comprension mester subi mesa y inicio mester wordo duna na un estudio mas profundo di COHO y su resultadonan enfrente e realidad di Guera di Ukraine, cu ainda no a duna prueba di tur su resultadonan.
